1150 x 80 px

පුටින්ගේ නිවාඩුව

 

ට්‍රම්ප් වැඩකරන දින 17 ක් ධවල මන්දිරයෙන් නිවාඩු ගියේ ‘වැඩකරන ගමන්’ ගොල්ෆ් ගැසීමට ය. ඒකට කියන්නේ ‘වර්කින් වැකේෂන්’ කියා ය.

ඔහු තමන්ට ධවල මන්දිරයේ පැවරී තිබූ කුදු මහත් වැඩ කටයුතු නිසා වෙහෙසට පත්ව සිටියෙන් නිවාඩු ගැනීමට සිතුවා විය යුතුය. ඒ වෙහෙසකාරී රාජකාරි අතර ඉදිරියෙන්ම තිබුණේ රුසියානු පළහිලව්වයි. 2016 ජනාධිපතිවරණ ප්‍රචාරක ව්‍යාපාරය අස්සේ රුසියාව සමග ඩීල් දැමූ බවටත්, ඇමරිකාවේ රාජ්‍ය රහස් කිසි පරිස්සමක් නැතිව රුසියාවට හෙළි කළ බවටත්, පුටින්ට පමණට වඩා ළං වූ බවටත් ඔහුට නැගී ඇති චෝදනාව සුළුපටු නොවේ. ඒ සම්බන්ධයෙන් වෙනම ෆෙඩරල් පරීක්ෂණයක් පවා මේ මොහොතේ පැවැත්වෙයි. කෙසේ නමුත් මේ වන විට වාර්තා වන්නේ ට්‍රම්ප් නිවාඩු යන විට පුටින් ද නිවාඩු ගොස් තිබෙන බවයි.

පුටින් කොහාමටත් ‘බොඩි බිල්ඩින් කොල්ලෙකි’. තවද ජූඩෝ ක්‍රීඩකයෙකි. කේජීබී රහස් ඔත්තුකරුවෙක් මෙන් රාජ්‍ය සේවයට මුලින්ම බැඳුණු කාලයේ පටන් ඔහු ශරීර සුවතාවය ගැන හද පත්ලෙන්ම උනන්දු ය. දැන් ඔහු නැවතත් උඩුකය නිරුවතින් සයිබීරියාවේ හිමමිදුණු විල්වල කිමිදෙමින් මාළු අල්ලමින් සිටියි. කඳු නැගීම සහ කයැක් ඔරුපැදීම ද ඔහු ජයටම කරයි. ක්‍රෙම්ලිනය ඒ බව සනාථ කරමින් මාධ්‍ය වෙත නිකුත් කළ අලුත්ම ඡායාරූප කිහිපයක් මේ සමග පළ වේ.

මේ එක් ඡායාරූපයක පුටින් කැළෑ රොදකට වැදී හතු ගළවමින් සිටින්නේ ආරක්ෂක ඇමති සෙර්ගෙයි ෂොයිගු සමගය. ඊට අමතරව පුටින් ‘තුමූම බෝට්ටු පැද්දේය’. ඉර රැස් නෑවේය. මාළු බෑවේය. පරිසරයේ වර්ණය අනුව පාට වෙනස් කරන කිමිදුම් කට්ටලයක් ඇඳගෙන විල් පත්ලක කිමිදුණේය.

පුටින්ගේ ‘වැකේෂන් ෆොටෝ’ ක්‍රෙම්ලිනය විසින් මාධ්‍ය වෙත නිකුත් කළ පළමු අවස්ථාව මෙය නොවේ. එවැනි ඡායාරූප එක් කර මුද්‍රණය කළ කැලැන්ඩරයක් පවා ක්‍රෙම්ලිනයේ තිබේ. එයින් එකක දැක්වෙන්නේ පුටින් පූස් පැටවුන් වඩාගෙන සිටිනා ආකාරයයි. තවත් පින්තූරයක ඔහු තෙත ඇඳුමක් ඇඳගෙන සිටින ආකාරයත්, අසෙකු පිට යන අන්දමත්, හැතැක්ම පහක් දුර කඳු නැගීමෙන් අනතුරුව ගසක් යට ගිමන් හරින ආකාරයත් දැක්වෙයි. 2012 වසරේ පුටින් කොක්කුන්ට පාර පෙන්වන්නට කෘත්‍රිම “කොක් යානයක” නැගී සයිබීරියාව හරහා පියාසර කළ ආකාරය ඔබට මතක ඇතැයි සිතමු. එවර ඔහු කියා තිබුණේ තමන්ගේ ග්ලයිඩරය සැර සුළංවල බලපෑමට හසු නොවුණා නම් සංක්‍රමණික පක්ෂීන්ගේ මාර්ගය දිගේ ඉන්දියාවට හෝ ඉරානයට වුණත් යන්නට තමන් ලැහැස්ති පිට සිටි බව ය. තවද එම වඳ වී යාමේ තර්ජනයට ලක් වී සිටි අලංකාර පක්ෂීන් ගැන මාධ්‍යවේදීන් ඔහුගේ අදහස ඇසූ විට ඔහු පිළිතුරු දුන්නේ ‘ලස්සන කොල්ලො ටිකක්’ (pretty lads) කියා ය. පුටින් අන්න එහෙම කෙනෙකි!

කෙසේ නමුත් ට්‍රම්ප් සහ පුටින් යන දෙදෙනාම මේ වන විට භූ දේශපාලන සිතියම තුළ එකම තැනක පන්දු කෙළිමින් සිටින්නෝය. එකම වෙනස ලෝක බලවතා වන්නට පුටින් මොළයෙන් පන්දුව දමන විට ට්‍රම්පා ‘ග්‍රේට් ඇමරිකා-ග්‍රේට් ඇමරිකා’ යනුවෙන් බොරුවට මර හඬ තළමින් පන්දුව අල්ලන්නට මෙලෝ හසරක් නැතිව දුව යාමයි.

ලෝකය සද්භාවයෙන් විශ්වාස කරනා අන්දමට, ට්‍රම්ප් ගොල්ෆ් ගහන ඇමරිකාවේ නිව් ජර්සි ජනපදය සහ පුටින් මාළු අල්ලන රුසියාවේ ඈත සයිබීරියාව පිහිටා තිබෙන්නේ ලෝක ගෝලයේ දෙපැත්තේ ය. ඒ අනුව මේ මොහොතේ දෙන්නා දෙකොනක සිට හෙවත් ‘කෙළිමින්’ හෙවත් ක්‍රීඩා කරමින් සිටින්නෝය. නමුත් මේ දෙදෙනාගෙන් එකෙක්වත් විශ්වාස කරන්නට බැරි ය. මේ දෙදෙනාම වමට සිග්නල් දමා දකුණට හරවන අය ය. අනෙක, ට්‍රම්ප්ට රුසියාව ගෙදර මෙන්ම හුරුපුරුදු ය. බොරු නම් පුටින්ගෙන් අහන්න! නැතිනම් 2013 වසරේ මිස් යුනිවර්ස් තරගයේදී ට්‍රම්ප් ළඟින්ම සිටි රුසියාවේ රූප සුන්දරියන්ගෙන් අහන්න!!

පාන්දර දෙකට තුනට අවදි වී නිදි කලන්තයෙන් ට්විට් කිරීම ට්‍රම්ප්ගේ සුපුරුදු සිරිතයි. කොහොම වුණත් දැනට පවතින තත්වය අනුව ට්‍රම්ප්, ඉදිරි දින 14 ඇතුළත යම් දිනෙක,ඵළිවෙන ජාමෙට මෙවැනි ට්වීටයක් කර තිබුණොත් පුදුම නොවන්න. “ග්‍රීටින්ස් ෆ්‍රොම් රෂියා..(රුසියාවේ සිට සුබපැතුම්) ”!!! “Greetings from Russia” !!!

-ක්‍රිෂාන්ති රාජපක්ෂ

Additional Info

මෙම පුවත පිළිබඳව යම් පාර්ශවයකට අගතියක් සිදුවූයේ නම් ඒ සම්බන්ධයෙන්  ප්‍රතිචාර දැක්වීමට ඔබට අයිතියක් ඇති බව අප පිළිගනිමු. ඒ අනුව ඔබගේ ප්‍රතිචාරය editor@lankanewsweb.net වෙත යොමු කරන්න

Top