1150 x 80 px

ජනපති මෛත්‍රී 'චිචී'ව අගයයි

"රාජපක්ෂ පවුලෙන් දේශපාලනයට ගේන්න ඕනෙ කෙනාව මෙච්චර කල් හංගාගෙන නෙ ඉඳලා තියෙන්නේ" යනුවෙන් ජනපති මෛත්‍රීපාල සිරිසේන මහතා ඊයේ රෝහිත රාජපක්ෂ ගැන ප්‍රකාශ කර තිබේ. ජනපතිවරයා මෙසේ ප්‍රකාශ කර ඇත්තේ ඊයේ රෝහිත රාජපක්ෂ පොලිස් මූල්‍ය අපරාධ කොට්ටාශයට ප්‍රකාශයක් ලබා දීමෙන් අනතුරුව පිටතට පැමිණ මාධ්‍ය වෙත අදහස් පළ කළ වීඩියෝව නරඹමිනි. 

 

සුප්‍රීම් සැට් චන්ද්‍රිකා ව්‍යාපෘතිය පිළිබඳව ප්‍රශ්න කිරීම සඳහා ඊයේ රෝහිත රාජපක්ෂව පොලිස් මූල්‍ය අපරාධ කොට්ටාශය වෙත කැඳවා තිබිණි. තම ප්‍රකාශය ලබා දීමෙන් පසුව පිටතට පැමිණි රෝහිත රැස්ව සිටි මාධ්‍ය වෙත ප්‍රකාශ කළේ තමන් සුහදව ප්‍රකාශය ලබා දුන් බවත් එම වැඩසටහනේ තමන් දැරූ තනතුරු පිළිබඳව FCIDය වෙත කරුණු ඉදිරිපත් කළ බවත්ය. ඔහු එසේ සන්සුන්ව මාධ්‍ය වෙත කතා කරන වීඩියෝව නැරඹූ ජනාධිපති මෛත්‍රීපාල සිරිසේන මහතා "මේ කොල්ලා අනිත් හාදයෝ දෙන්නාට වැඩිය හොඳයි. මොළේ පාවිච්චි කරලා වැඩක් කරනවා. බලන්න මෙතන බැලන්ස් කරලා සුහදව කතා කරන විදිහ. රාජපක්ෂ පවුලෙන් දේශපාලනයට ගේන්න ඕනෙ කෙනාව මෙච්චර කල් හංගාගෙන නෙ ඉඳලා තියෙන්නේ" යනුවෙන් පවසා ඇත. 

බුද්ධි අංශ වාර්තා අනුව ද කියවෙන්නේ ඊයේ දිනයේ රෝහිත රාජපක්ෂගේ හැසිරීම එක්සත් ජාතික පක්ෂයෙහි ප්‍රබලයින්ගේ පවා පැසසුමට ලක් වී ඇති බවය. එසේම FCID අභ්‍යන්තර අරංචි මාර්ග සඳහන් කරන්නේද මෙතෙක් පැවති පරීක්ෂණ වලදී නාමල් සහ යෝෂිත අනාගෙන ඇතත් රෝහිත ජාම බේරාගෙන ඇති බවය. 

මීට මාස කිහිපයකට ඉහත දී ශිරන්ති රාජපක්ෂ සාත්තර බැලීම සඳහා මුල්ලේරියාවේ 'මෑණි' කෙනෙකු වෙත ගිය ගමනක් පිළිබඳව ලංකා නිව්ස් වෙබ් අපි අනාවරණය කළෙමු. ඒ පුවතට අනුව ද සාත්තරයෙන් හොඳක් කියවී තිබුණේ රෝහිත ගැන පමණි. සාත්තර මෑණියෝ ශිරන්තිට පවසා තිබුණේ "ලොකු එක්කෙනා ගැන නම් කියලා වැඩක් නැහැ. මිනිහා යාපනේ යනවා කිව්වොත් යන්නේ මොණරාගල. මද්දුමයා නම් ඉන්නේ වැලිකඩ දොරකඩ. කවදාහරි පවුලට ගොඩයෑමක් තියෙනවා නම් තියෙන්නේ මේ පොඩි දරුවාගෙන් තමයි" කියාය. සාත්තරයේ කියූ ලෙසම මාස කිහිපයකින් යෝෂිතට බන්ධනාගාරගත වන්නට ද සිදු වී තිබිණි. 

කෙසේවෙතත් පවුලට ගොඩයෑමක් වෙතොත් ඒ රෝහිතගෙන් බව කියන්නට සාත්තර වුවමනා නැත. රාජපක්ෂ පවුලේ ඉතිරි හතර දෙනාගේම කෙරුවාවල් අනුව ඔවුන්ට නුදුරේදීම සිදුවනු ඇත්තේ එක්කෝ ප්‍රජා අයිතිය අහිමි කරගැනීමටය. නැතිනම් බන්ධනාගාර ගත වීමටය. අනාගතයේ එන ජනාධිපතිවරයකු සමඟ හෝ සුහදව ගනුදෙනුවක් කතාබහ කරගෙන පවුලේ අයව 'එළියට ගන්නට'වත් ඉන්නවා නම් ඉන්නවා ඇත්තේ 'චිචී' විතරය.

Additional Info

මෙම පුවත පිළිබඳව යම් පාර්ශවයකට අගතියක් සිදුවූයේ නම් ඒ සම්බන්ධයෙන්  ප්‍රතිචාර දැක්වීමට ඔබට අයිතියක් ඇති බව අප පිළිගනිමු. ඒ අනුව ඔබගේ ප්‍රතිචාරය [email protected] වෙත යොමු කරන්න

Top