Untitled 1

දයාසිරි, සියඹලාපිටිය, චන්දිම, විජයමුණි ඉවතට! ශ්‍රීලනිපය කැබිනට් සංශෝධනයට සූදානම්!!

සෙනසුරු අපලය ලෙස ‘අද නොවෙයි හෙට' අයුරින් දිග්ගැස්සෙමින් පවතින කැබිනට් සංශෝධනය සඳහා මෛත්‍රීපාල සිරිසේන මහතාගේ නායකත්වයෙන් යුතු ශ්‍රී ලංකා නිදහස් පක්ෂය මේ වන විට සූදානම් බව එම පක්ෂයේ අභ්‍යන්තර ආරංචි මාර්ග පවසයි.

ඒ අනුව ක්‍රීඩා අමාත්‍ය දයාසිරි ජයසේකර, විදුලි බල හා පුනර්ජනනීය බලශක්ති අමාත්‍ය රංජිත් සියඹලාපිටිය, ඛණිජ තෙල් අමාත්‍ය චන්දිම වීරක්කොඩි හා වාරිමාර්ග හා ජලසම්පත් කළමනාකරණ අමාත්‍ය විජිත් විජයමුණි සොයිසා වැනි අමාත්‍යවරුන්ගේ තනතුරු අහිමි වීමට බොහෝ දුරට ඉඩ ඇති බව සඳහන්.

ඉහත කී අමාත්‍ය පිරිසෙන් එක් අයෙකු කැබිනට් මණ්ඩලයේ හිදිමින් හිටපු ජනාධිපති මහින්ද රාජපක්ෂ මහතාට ආණ්ඩුවේ සියළු ‍තොරතුරු ලබාදෙන පුද්ගලයෙකු බව රාජ්‍ය බුද්ධි සේවය (SIS) මගින් පවා තහවුරු කර තිබේ. මෙම පුද්ගලයා පිළිබඳව ජනාධිපතිවරයා තදබල කලකිරීමකින් සහ කෝපයෙන් පසුවන බව පක්ෂ අභ්‍යන්තර ආරංචි මාර්ග සඳහන් කරයි.

අනෙක් අමාත්‍යවරුන් සිය පදවි අහිමිකර ගැනීමට හේතු වී ඇත්තේ එකී ධූරයන් පිළිබඳව ඔවුන් දක්වන අකාර්යක්ෂමභාවයයි (Non performers).
ඔවුන්ගෙන් හිස්වන ධූර සඳහා ජේෂ්ඨ අමාත්‍ය එස්.බී. දිසානායක, සරත් අමුණුගම, ඩිලාන් පෙරේරා සහ තිලංග සුමතිපාල පත් කිරීමට නියමිත බව සඳහන්.

එජාපය තවදුරටත් නොවෙනස්
කැබිනට් සංශෝධනයේදී එජාපයේ වෙනස්වන තනතුරු පිළිබඳව ‘ලංකා නිවුස් වෙබ්'කළ විමසීමකදී, එජාපයේ ජේෂ්ඨයෙකු පවසා සිටියේ අගමැතිවරයා තමන්ගේ අමාත්‍යවරුන් පිළිබඳව තබා ඇති විශ්වාසය ඔවුන් කඩ කොට නැති බැවින් හා තම විෂය පථය තුළ ඔවුන් පසුගිය වසර 2 ක කාලය තුළ ලබා ගෙන ඇති ප්‍රගතිය පිළිබඳව අගමැතිවරයා සෑහීමකට පත්වී ඇති බැවින් තනතුරු සංශෝධනය නොවන බවයි.

අප කලින් වාර්තා කළ ආකාරයට අගමැතිවරයා ජනාධිපතිවරයාට ස්ථිරව ප්‍රකාශ කර ඇත්තේ ජාතික ආණ්ඩුවේ අවබෝධතා ගිවිසුම ප්‍රකාරව එජාපයට අයත් අමාත්‍යංශ පිළිබඳව එජාපයටත් ශ්‍රීලනිපයට අයත් අමාත්‍යංශ පිළිබඳව ශ්‍රීලනිපයටත් තීරණ ගැනීමට ඉඩ හැරිය යුතු බවකි.

කෙසේ නමුදු ජනාධිපති මෛත්‍රීපාල සිරිසේන මහතා මේ මස 23 වෙනිදා ඕස්ට්‍රේලියාව බලා යාමට නියමිත අතර මේ මස 28 වෙනිදා අග්‍රාමාත්‍ය රනිල් වික්‍රමසිංහ මහතා ඇමරිකා එක්සත් ජනපදය බලා යාමට නියමිත වේ.

සබැඳි සටහන්

"මගේ ටික මම බලාගන්නන් ඔයාගේ ටික ඔයා බලාගන්න" - අගමැති ජනපතිගෙන් ඉල්ලයි !

Additional Info

මෙම පුවත පිළිබඳව යම් පාර්ශවයකට අගතියක් සිදුවූයේ නම් ඒ සම්බන්ධයෙන්  ප්‍රතිචාර දැක්වීමට ඔබට අයිතියක් ඇති බව අප පිළිගනිමු. ඒ අනුව ඔබගේ ප්‍රතිචාරය [email protected] වෙත යොමු කරන්න

Top