2019 පාස්කු ඉරිදා දිනයේදී කතෝලික දේවස්ථාන සහ කොළඹ තරු හෝටල්වලට බෝම්බ ප්රහාරයක් එල්ල වන බවට ප්රමාණවත් බුද්ධි තොරතුරු ලැබී තිබියදීත් එය වළක්වා ගැනීමට ක්රියාමාර්ග නොගැනීම තුළින් හිටපු ජනාධිපති මෛත්රීපාල සිරිසේන, හිටපු ආරක්ෂක ලේකම් හේමසිරි ප්රනාන්දු, හිටපු පොලිස්පති පූජිත් ජයසුන්දර, රාජ්ය බුද්ධි සේවයේ හිටපු ප්රධානී නිලන්ත ජයවර්ධන, හිටපු ජාතික බුද්ධි ප්රධානී සිසිර මෙන්ඩිස් යන අය මූලික මිනිස් අයිතිවාසිකම් උල්ලංඝනය කර ඇති බවට ශ්රේෂ්ඨාධිකරණය අද (12) තීන්දු කළේය.
ඒ අනුව හිටපු ජනාධිපති මෛත්රීපාල සිරිසේන මහතා විසින් රුපියල් මිලියන 100ක් ද, හිටපු පොලිස්පති පූජිත් ජයසුන්දර සහ හිටපු රාජ්ය සේවයේ බුද්ධි ප්රධානී නිලන්ත ජයවර්ධන විසින් රුපියල් මිලියන 75 බැගින් ද, හිටපු ආරක්ෂක ලේකම් හේමසිරි ප්රනාන්දු විසින් රුපියල් මිලියන 50ක් ද, හිටපු ජාතික බුද්ධි ප්රධානී සිසිර මෙන්ඩිස් මහතා විසින් රුපියල් මිලියන 10ක් ද සිය පුද්ගලික මුදලින් වන්දි ගෙවිය යුතු බවට ශ්රේෂ්ඨාධිකරණය නියෝග කර තිබේ.
මීට අමතරව රජය විසින් රුපියල් මිලියනයක් වන්දි වශයෙන් ගෙවිය යුතු බවටත් නියෝග කර ඇත.
එමෙන්ම රාජ්ය බුද්ධි සේවයේ හිටපු ප්රධානී, ජ්යේෂ්ඨ නියෝජ්ය පොලිස්පති නිලන්ත ජයවර්ධනට එරෙහිව විනය පරීක්ෂණයක් සිදුකරන ලෙසත් එම නඩු තීන්දුවෙන් නියෝග කර තිබේ.
මෙය සියලුම දේශපාලනඥයින් සහ රාජ්ය නිලධාරීන්ගේ ඇස් ඇරවන විශිෂ්ඨ නඩු තීන්දුවක් වශයෙන් සැලකිය හැකිය. මින් ඉදිරියට දේශපාලනඥයින්ට හෝ රාජ්ය නිලධාරීන්ට වගකීමෙන් තොරව කටයුතු කර ගැළවීමක් නොලැබෙන බවට මෙම නඩු තීන්දුවෙන් තදබල පාඩමක් උගන්වා තිබේ.
RN
