සටහන – රෂිකා හෙන්නායක
ජනවාරි 14 කොළඹ (LNW):ඊයේ (13) පස්වරුවේදී අනවසර ධීවර කටයුතුවල නිරත වූ ඉන්දීය ධීවරයින් 12 දෙනෙකු මෙරට මුහුදු සීමාව තුළදී නාවික හමුදා භාරයට ගෙන ඇත.
යාපනය, කරෙයිනගර් කෝවිලන් ප්රදීපාගාරයට ඔබ්බෙන් වූ උතුරු මුහුදේ සිදු කළ විශේෂ මෙහෙයුමක දී නාවික හමුදාව විසින් ධීවර යාත්රා 03ක සිටි මෙම ඉන්දීය ධීවරයින් අත්අඩංගුවට ගෙන ඇති අතර, මෙම ඉන්දීය ධීවරයින් සහ යාත්රා කන්කසන්තුරය වරාය වෙත රැගෙනවිත් ඉදිරි නීතිමය කටයුතු සඳහා මයිලඩි ධීවර පරීක්ෂක කාර්යාලය වෙත භාර දීමට නියමිත බව පැවසේ.
වැඩිදුරටත් නාවික හමුදාව සඳහන් කරන්නේ, මෙරට මුහුදු සීමාවට ඇතුළු වී අනවසර ධීවර කටයුතුවල නිරත වූ ඉන්දීය ධීවර යාත්රා රැසක් උතුරු නාවික විධානය මඟින් නිරීක්ෂණය කර, එම ධීවර යාත්රා මෙරට මුහුදු සීමාවෙන් ඔබ්බට පලවා හැරීමට ද කටයුතු කළ බවයි.
රටපුරා සියලු තොරතුරු දැනගන්න එක්වන්න අපගේ Whatsapp Newsroom වෙත👇👇
