වනජීවී දෙපාර්තමේන්තුව පසුගිය වසරේදී, විවිධ පුද්ගලයන් වනාන්තරයට සහ වනජීවීන්ට සිදුකරන හානි සදහා නඩු පැවරීම මගින් රුපියල් හැත්තෑ ලක්ෂයක ආදායමක් දඩ මුදල් වශයෙන් උපයාගෙන ඇති බව වාර්තා වේ.
එමෙන්ම 2022 වසරේ නොවැම්බර් මාසය වනවිට වනජීවී දෙපාර්තමේන්තුව උපයා ඇති සමස්ත ආදායම රුපියල් මිලියන 1421ක් වන අතර, මින් වැඩි මුදලක් උපයා තිබෙන්නේ බලපත්‍ර ගාස්තු අය කිරීම මගින් බව ද සඳහන්.
ඉහත කරුණු අනාවරණය වී තිබෙන්නේ කෘෂිකර්ම වනජීවී හා වනසම්පත් සංරක්ෂණ අමාත්‍ය මහින්ද අමරවීර මහතා වනජීවී දෙපාර්තමේන්තුව සමග සිදු කළ සාකච්ඡාවක් අතරතුරදී ය.
සාකච්ඡාව අමතමින් අමාත්‍යවරයා උපදෙස් ලබා දී තිබෙන්නේ, මේ දිනවල විදේශීය සංචාරකයින් බහුල වශයෙන් නැවතත් මෙරටට පැමිණෙන බැවින් ජාතික වනෝද්‍යානවලට ඔවුන් පැමිණෙන අවස්ථාවල දී ප්‍රමාදයකින් තොරව ප්‍රවේශපත් නිකුත් කිරීම සඳහා අතිරේක ප්‍රවේශපත් කවුළු විවෘත කරන ලෙසත්, එමඟින් සිදුවන ප්‍රමාදයන් වළක්වා ගැනීමට පියවර ගන්නා ලෙසත් ය.
තව ද, මෙම වසර තුළ යාල ජාතික වනෝද්‍යානය මෙන්ම විල්පත්තුව හා වස්ගමුව ජාතික වනෝද්‍යාන සඳහා විදේශ සංචාරක ආකර්ශනය දිනා ගැනීමේ වැඩසටහන් දියත් කරන ලෙස ද හෙතෙම වැඩිදුරටත් උපදෙස් ලබා දී ඇත.
රෂිකා හෙන්නායක
