සටහන – රුවන් නෙළුගොල්ල
කොළඹ වරායේ බහාලුම් නිෂ්කාශනය ප්‍රමාද වීම හේතුවෙන් ඇතිවී ඇති තදබදය විසඳීම සඳහා ජනාධිපති අනුර කුමාර දිසානායක මහතා පසුගිය සතියේදී ලබාදුන් උපදෙස් පිළිපදිමින් සියලු දෙනාම කටයුතු කරන ආකාරයක් පෙනෙන්නට නොමැති බවත් වරායේ පවතින තත්වය සම්බන්ධයෙන් තමන්ට සතුටු විය නොහැකි බවත් ප්‍රවාහන, මහාමාර්ග, වරාය හා සිවිල් ගුවන් සේවා අමාත්‍ය බිමල් රත්නායක මහතා පවසයි.
“මම අවංකවම පෞද්ගලිකව සතුටු වෙන්නෙ නෑ. මේ සතිය තුළදී ජනාධිපති දුන්නු උපදෙස් අනුව හැම කෙනාම ඒක කරන බව නම් පේන්නෙ නෑ. මං ඒක අවංකවම කියන්න ඕනෙ. පැය 24 වැඩ කරන්න කිව්වාට රෑ 03.20 ට සමහර අංගනවල වැඩ නතර වෙනවා. පෑලියගොඩ ඉංජිනේරු සංස්ථාවට අයිති ඉඩම අපි දැන් ලෑස්ති කරලා ඒක සුද්ද කරලා ඒකෙ ගාඩ්ලා දාලා බලන් ඉන්නවා ලොරිවල මහත්තුරු ක්ලියර් කරන් ඇවිල්ලා එතන පාර්ක් කරගනී කියලා. හැබැයි ලොරි රථ එන්නෙ නෑ තාම. ඒගොල්ලො තාම ඇතුළෙ ලොරි 500 – 600 තියන් ඉන්නවා. අපි දැක්කෙ නෑ සමහර පෞද්ගලික අංශයේ ආනයනකරුවන්ගේ පැත්තෙන් එතරම්ම සහයෝගයක් ලැබෙනවා. ඉතින් කවුරුත් කන්ට්‍රිබියුට් කරන්නෙ නැත්නම් අපි රටට කියනවා ඇත්ත තත්වය. අපි ළඟ සියලුම ප්‍රස්තාර තියෙනවා, සියලුම වාර්තා තියෙනවා, නිලධාරීන් ආපු වෙලාවල් ගියපු වෙලාවල් තියෙනවා, පෞද්ගලික අංශයේ අය රිපෝට් කරපු වෙලාවල් තියෙනවා, අපි ඔක්කොම රටට කියනවා”
අමාත්‍ය බිමල් රත්නායක මහතා මේ බව පැවසුවේ ඊයේ (ජනවාරි 20) කොළඹ වරායේ නිරීක්ෂණ චාරිකාවක නිරත වීමෙන් අනතුරුව මාධ්‍ය වෙත අදහස් දක්වමිනි.
