සටහන: සශිකලා මධුෂාණි
ජනවාරි 21; ලෝකය(අවුට්බවුන්ඩ් ටුඩේ) : දකුණු කොරියාවේ වැඩ තහනමට ලක්වූ ජනාධිපති යූන් සුක් යෙයෝල් මුල්වරට අද(21) අට දෙනෙකුගෙන් යුත් ව්‍යවස්ථාපිත අධිකරණ විනිසුරු මඩුල්ලක් ඉදිරියේ සිය දෝෂාභියෝග නඩු විභාගයේදී පෙනී සිටි බව වාර්තා වේ.
මෙහිදී පසුගිය දෙසැම්බර් 03වන දා යුධ නිතිය පැනවීමෙන් අනතුරව නීති සම්පාදකයන් අත්අඩංගුවට ගන්නා ලෙස හමුදාපතිවරුන්ට නියෝග කරන ලද බවට වූ චෝදනාවන් යුන් ප්‍රතික්ෂේප කර තිබු අතර මෙහිදී යුන් විනිසුරුවන්ට ප්‍රකශ කර තිබුණේ, තමා ලිබරල් ප්‍රජාතන්ත්‍රවාදය පිළිබඳ දැඩි විශ්වාසයකින් ජීවත් වූ පුද්ගලයෙකු බවත්, ව්‍යවස්ථාපිත අධිකරණය පවතිනුයේ ව්‍යවස්ථාව ආරක්‍ෂා කිරීමට බැවින් මෙම නඩුවේ සියලු අංශ හොඳින් පරීක්‍ෂා කරන ලෙස ඉල්ලා සිටින බවත්ය.
කෙසේ නමුත්, යූන් කැරැල්ලකට නායකත්වය දුන්නේද යන්න සම්බන්ධයෙන් වෙනම අපරාධ පරීක්ෂණයකට ද මුහුණ දී සිටියි. යූන්ට යුද නීතිය යෝජනා කළ බව වාර්තා වූ හිටපු ආරක්ෂක අමාත්‍ය කිම් යොං-හ්යුන් බ්‍රහස්පතින්දා (23) මීළඟ නඩු විභාගයේදී සාක්ෂි දෙනු ඇති අතර විනිසුරු මඩුල්ලෙන් අවම වශයෙන් හය දෙනෙකු දෝෂාභියෝගය තහවුරු කිරීමට ඡන්දය ප්‍රකාශ කළහොත් යූන් ධුරයෙන් පහ කරනු ලැබේ.
එවිට දින 60ක් ඇතුළත ජනාධිපතිවරණයක් කැඳවිය යුතුය. මේ වන විට යුන්ගේ ආධාරකරුවන් අධිකරණය ඉදිරියේ ඉතා ප්‍රචන්ඩකාරීව හැසිරෙමින් සිටින අතර ඔවුන් යූන් නිදහස් කර වහාම නිලයට පත් කරන ලෙස ඉල්ලා සිටියි.
පසුගිය දෙසැම්බර් 3 වැනිදා සිට දකුණු කොරියාව දේශපාලන අවුල් ජාලයක පවතින අතර අර්බුදය රටේ ආර්ථිකයට පහර දෙමින් ඇත.
