අශෝක ජයතුංග
ජනවාරි 27 වොෂින්ටන් LNW :
අගමැති හරිනිගෙන් උප ජනපති වෑන්ස්ට හා විදේශ ඇමති විජිත ගෙන් විදේශ ලේකම් රුබියෝ ටත් සුබපැතුම්
ඇමෙරිකා එක්සත් ජනපදයේ 47 වන ජනපති ලෙස පත්වූ ඩොනල්ඩ් ජේ. ට්‍රම්ප් මහතාට සුබ පතමින් ශ්‍රී ලංකා ජනාධිපති අනුර කුමාර දිසානායක මහතා එවූ පණිවිඩය වොෂින්ටනයේ ශ්‍රී ලංකා තානාපති මහින්ද සමරසිංහ මහතා විසින් පසුගිය 24 දා බාර දෙනු ලැබීය.
තවද ඇමෙරිකාවේ නව උප ජනපති ජේ. ඩී. වෑන්ස් මහතා වෙත අග්‍රමාත්‍ය ආචාර්ය හරිනි අමරසූරිය මැතිනිය එවා තිබූ සුබ පැතුම හා අභිනව ඇමෙරිකානු විදේශ ලේකම් මාර්කෝ රුබියෝ මහතා වෙත විදේශ ඇමති විජිත හේරත් මහතාගේ සුබ පැතුම පණිවිඩය ද ඒ සමගම බාර දෙනු ලැබිණ.
රාජ්‍ය දෙපාර්තමේන්තුවේ දකුණු හා මධ්‍යම ආසියාව බාර නියෝජ්‍ය සහකාර ලේකම් එළිසබෙත් හෝස්ට් හා නි: සහකාර ලේකම් නිකොලි චුලික් මහත්ම මහත්මීන් වෙත රාජ්‍ය දෙපාර්තමේන්තුවේදී අදාළ සුබ පැතුම් බාරදෙනු ලැබිණ. එහිදී දෙරට අතර වසර 76 ක මිත්‍රත්වය හා අන්‍යන්‍ය සහයෝගීතාව හා ඉදිරි සැළසුම් ගැන ද අවධානය යොමු කෙරිණ.
තවද කැලිෆෝනියාවේ ලොස් ඇන්ජලීස් අවට පැතිරුනු ලැව්ගිණි හා ඉන් පීඩාවට පත් වූ හා දේපොළ විනාශවූ අය ගැන ශ්‍රී ලංකාවේ බලවත් කනගාටුව ද තානාපති සමරසිංහ මහතා විසින් එහිදී පළ කළේය. සුනාමි අනතුරෙන් ශ්‍රී ලංකාව පීඩාවට පත් වූ අවස්ථාවේ ඇමෙරිකාව ලබාදුන් සහන හා සෙසු සියලු සහයෝගීතාවන් ගැන තානාපතිවරයා කෘතඥ පූර්වකව සිහිපත් කල අතර ශ්‍රී ලංකා තේ තොගයක් පීඩාවට පත්වු ජනතාවට ලබාදීමේ හැකියාවද සිහිපත් කළේය.
තවද ශ්‍රී ලංකා ජනාධිපති හා විදේශ ඇමතිවරයාගේ අනුදැනුම මත ඇමෙරිකාවේ සිටින ප්‍රධාන බෞද්ධ භික්ෂූන් තානාපති පරිශ්‍රයට වැඩම කොට පීඩාවට පත් ඇමෙරිකානු ජනතාවට සෙත්පතා පිරිස් සජ්ජායනය හා සෙසු ආගමික වතාවත් සිදුකරන පුණ්‍යයෝත්සවය රාජ්‍ය දෙපාර්තමේන්තුවේ ඉහළ නිළධාරීන්ගේ ප්‍රධානත්වයෙන් 24 දා සිදුකරන බව ද තානාපති මහින්ද සමරසිංහ මහතා දැනුම් දුන්නේය.මෙම අවස්ථාවට නි: දූත මණ්ඩල ප්‍රධානී රෝහණ අඔගොල්ල හා කොන්සියුලර් චතුරි පෙරේරා මහත්ම මහත්මීන්ද එක්වූහ.
