*
දේශීය පුවත් විස්තරය: සාරාංශය 01/31
- විදුලි ට්‍රාන්ස්ෆෝමර් විනාශ කළ, නිවෙස්වල විදුලි පහන් දැල්වීමට ඉඩ නොදුන් අඳුරු යුගවල පවා මේ රටේ දරුවන් සාර්ථකව විභාගවලට පෙනී සිටි බව අධ්‍යාපන අමාත්‍ය ආචාර්ය සුසිල් ප්‍රේම්ජයන්ත් ප්‍රකාශ කරයි.
- විදේශ බැඳුම්කර හිමියෝ ශ්‍රී ලංකාවේ විධිමත් ප්‍රතිව්‍යුහගත කිරීමේ සාකච්ඡා සඳහා පෙනී සිටීමට පෙර දේශීය මුදල් ණය පිළිබඳ වැඩි පැහැදිලි කිරීමක් අපේක්ෂා කරති – ශ්‍රී ලංකාවේ දේශීය ණය කන්දරාව කළමනාකරණය කිරීම මිල අධික වනු ඇතැයි ණයහිමියෝ සැලකිලිමත් වෙති.
- ජාත්‍යන්තර මූල්‍ය අරමුදලේ ණය අනුමැතියෙන් පසු රටේ “ගෘහස්ථ ණය කලමනාකරණය කිරීම පිළිබඳ සවිස්තරාත්මක සාකච්ඡා” පවත්වනු ඇති බව මහබැංකු අධිපති නන්දලාල් වීරසිංහ ප්‍රකාශ කරයි – දේශීය වගකීම් ඉටු කරන බවත් විදේශ ණය පමණක් ගෙවන්නේ නැති බවත් නන්දලාල් විසින් මීට ඉහත තරයේ පවසා තිබිණි – පසුගිය මාසයේ, Fitch Ratings ආයතනය විසින් ශ්‍රී ලංකාවේ දේශීය මුදල් ණය මත ශ්‍රේණිගත කිරීම “ණය පැහැර හැරීමට” (default) මට්ටම් 02ක් ඉහළින් ස්ථානගත කර – කෙසේ වෙතත්, දත්ත පෙන්නුම් කරන්නේ මහබැංකුව කළමනාකරණය කරන සේවක අර්ථසාධක අරමුදල තවමත් රජයේ සුරැකුම්පත්වල විශාල වශයෙන් ආයෝජනය කරන බවත්, ජනතාවගේ ඉතුරුම් විශාල වශයෙන් අවදානමට ලක්ව ඇති බවත් ය.
- මත්ද්‍රව්‍යවලට එරෙහිව බස්නාහිර සහ දකුණු පළාත්වල පොලිස් විශේෂ කාර්ය බළකාය, පොලිසිය, යුද හමුදාව සහ ගුවන් හමුදාව එක්ව පැය 7ක මෙහෙයුමක් දියත් කර ඇතැයි පොලිසිය පවසයි – එහි දී මත්ද්‍රව්‍ය ජාවාරම්වල නියැලෙන්නන් 60 දෙනෙකු ඇතුළු සැකකරුවන් 285 දෙනෙකු අත්අඩංගුවට ගෙන ඇති අතර හෙරොයින් කිලෝග්‍රෑම් 01 ක් සහ කංසා කිලෝග්‍රෑම් 01 ක් ඇතුළු මත්ද්‍රව්‍ය තොගයක් ද අත්අඩංගුවට ගත් බව සඳහන්.
- අභියාචනාධිකරණයේ සභාපති විනිසුරු ලෙස එන්.බී.පී.ඩී.එස් කරුණාරත්න පත් කිරීමටත් අභියාචනාධිකරණයේ වත්මන් සභාපති විනිසුරු කේ.පී. ප්‍රනාන්දු ශ්‍රේෂ්ඨාධිකරණ විනිසුරුවරයකු ලෙස පත් කිරීමත් ආණ්ඩුක්‍රම ව්‍යවස්ථා සභාව අනුමත කරයි.
- ආර්ථිකයේ විශාලතම ප්‍රබෝධය ඇති කළ හැක්කේ සංචාරක කර්මාන්තයට බව අගමැති දිනේෂ් ගුණවර්ධන ප්‍රකාශ කරයි – එය තවදුරටත් වර්ධනය කිරීමට “නවමු” පියවර ගන්නා ලෙස පාර්ශවකරුවන්ගෙන් ඉල්ලා සිටී – සංචාරක ව්‍යාපාරය හඳුන්වාදීම සහ ප්‍රවර්ධනය කිරීම සඳහා විදේශයන්හි ගරු කොන්සාල්වරුන් සහ නියෝජිතයන්ගේ ජාලයක් ගොඩනැගිය යුතු බව ද අවධාරණය කරයි.
- පුනර්ජනනීය බලශක්තිය සඳහා ඉන්දියානු රජයෙන් ලැබෙන ඩොලර් මිලියන 100 ක ණය පහසුකම යටතේ අධ්‍යාපනික, ආගමික සහ රජයේ ගොඩනැගිලි ඇතුළු පරිශ්‍ර 11,219 ක වහල මුදුනේ සූර්ය පැනල ස්ථාපිත කරන බව බලශක්ති අමාත්‍ය කංචන විජේසේකර ප්‍රකාශ කරයි.
- තරුණයකු පැහැරගෙන යාමේ සිද්ධියකට සම්බන්ධ බවට හිටපු පාර්ලිමේන්තු මන්ත්‍රිනී හිරුණිකා ප්‍රේමචන්ද්‍ර ට එරෙහිව ගොනු කර ඇති නඩුව කොළඹ මහාධිකරණය විසින් පෙබරවාරි 28 වැනි දිනට කැඳවීමට නියම කරයි.
- උසස් පෙළ සිසුන්ට ඔවුන්ගේ විභාග කාලය තුළ අඛණ්ඩ විදුලිය ලබාදීම සම්බන්ධයෙන් එළඹි එකඟතාවයට අනුව කටයුතු නොකිරීම සම්බන්ධයෙන් ලංකා විදුලිබල මණ්ඩලය, ලංකා ඛනිජ තෙල් නීතිගත සංස්ථාව සහ විදුලිබල අමාත්‍යාංශයට එරෙහිව ශ්‍රේෂ්ඨාධිකරණය හමුවේ නඩුවක් ගොනු කර ඇති බව මානව හිමිකම් කොමිසම පවසයි.
- ක්‍රිකට් ඇතුළු සියලුම ක්‍රීඩා තේරීම් කමිටු සඳහා සාමාජිකයන් පත් කිරීම සඳහා නව රෙගුලාසි ළඟදීම හඳුන්වා දෙන බව ක්‍රීඩා අමාත්‍ය රොෂාන් රණසිංහ ප්‍රකාශ කරයි.
