සටහන – නිපුනි ලියනගේ
ජනවාරි 31, කොළඹ (LNW): මරුමලාර්චි ද්‍රවිඩ මුන්නේත්‍ර කසාගම් (MDMK) හි ප්‍රධාන ලේකම් සහ රාජ්‍ය සභා මන්ත්‍රී වයිකෝ ලෙසින් ප්‍රකට වෛයපුරි ගෝපාල්සාමි, ශ්‍රී ලංකාව සමඟ ඇති සබඳතාව පිළිබඳව ප්‍රවේශමෙන් සලකා බලන ලෙස ඉන්දීය රජයෙන් ඉල්ලා සිටින බව The Hindu පුවත්පත වාර්තා කරයි.
නවදිල්ලියේ ආරක්ෂක අමාත්‍ය රාජ්නාත් සිංගේ ප්‍රධානත්වයෙන් පැවති සර්ව පාක්ෂික රැස්වීමකදී වයිකෝ, දකුණෙන් මතුවිය හැකි තර්ජනය හුවා දක්වමින් චීනය විසින් හම්බන්තොට වරායක් ඉදිකිරීමේ උපායමාර්ගික වැදගත්කම අවධාරණය කළේය.
භූ දේශපාලනික ගැටළු වලට අමතරව, ශ්‍රී ලංකා නාවික හමුදාව විසින් දෙමළ ධීවරයින්ට එල්ල කරන ලදැයි කියන ප්‍රහාරයන් කෙරෙහි අවධානය යොමු කළ වයිකෝ, වාර්තා වූ ධීවරයින් 800 කට අධික සංඛ්‍යාවක් මියයාම පිළිබඳව දැඩි කනස්සල්ල ද පළ කළේය.
දෙමළ ධීවරයින්ගේ ජීවිත හා දේපළ ආරක්ෂා කිරීමේ වැදගත්කම අවධාරණය කරමින් මෙම ගැටලුවට කඩිනමින් විසඳුම් ලබා දෙන ලෙස ඔහු ඉන්දීය රජයෙන් ඉල්ලා සිටියි.
තමිල්නාඩු ආණ්ඩුකාර ආර්.එන්.රවී විවිධ කරුණු සම්බන්ධයෙන් නොගැලපෙන ප්‍රකාශ සිදු කරන බවට චෝදනා කරමින් විවේචනය කිරීමට ද වයිකෝ එහිදී අවස්ථාව ලබාගත් අතර, එම ප්‍රකාශවලට ප්‍රතිචාර දක්වමින් ආණ්ඩුකාරවරයාගේ පැහැදිලි කිරීම පෙන්වා දුන් වයිකෝ, මේ සම්බන්ධයෙන් අමාත්‍යවරයාට ප්‍රමාණවත් ලෙස දැනුම් දී නොතිබෙන්නට ඇතැයි යනුවෙන් ප්‍රකාශයක් සිදුකරන්නට විය.
තවද, වයිකෝ, ඉන්දියානු ප්‍රජාතන්ත්‍රවාදයට ඇති විය හැකි තර්ජන ගැන බිය පළ කළ අතර, එක් රටක්, එක් මැතිවරණයක්, එක් භාෂාවක් සහ එක් ආගමක් යටතේ මෙහෙයවනු ලබන ප්‍රතිපත්ති ක්‍රියාත්මක කිරීමට එරෙහිව අනතුරු ඇඟවීය.
