සුළු වැරදි සම්බන්ධයෙන් අධිකරණය මගින් වරදකරුවන් වන පුද්ගලයන් බන්ධනාගාර ගත කිරීම වෙනුවට නිවාස අඩස්සියේ තැබීමේ අලුත් ක්රමවේදයක් හඳුන්වා දීමට බන්ධනාගාර දෙපාර්තමේන්තුව සූදානම් වෙනවා. මීට අදාල යෝජනා මේ වනවිට රජය වෙත ඉදිරිපත් කර ඇති බවයි වාර්තා වන්නේ.
බන්ධනාගාරය තුළ පවතින අධික තදබදයට විසඳුමක් ලෙස හා බන්ධනාගාර රැඳවියන් සඳහා වැය කරන මුදල් අවම කර ගැනීම සඳහා මෙම යෝජනාව ඉදිරිපත් කර තිබේ.
දඩ මුදල් ගෙවාගත නොහැකිව හා රථවාහන වැරදි වැනි සුළු වැරදි හේතුවෙන් බන්ධනාගාර ගත වන පුද්ගලයන් ඉලක්ක කර ගනිමින් මෙම වැඩපිළිවෙල යෝජනා කෙරේ. දඩ ගෙවාගත නොහැකි පුද්ගලයන් නිවාස අඩස්සියේ තබා රැකියාවේ නිරතවීමටද අවස්ථාව ලබාදෙන අතර ඒ හරහා ඔවුන්ගේ දඩ මුදල් පියවීමටද අවස්ථාව හිමි වේ.
නිවාස අඩස්සියේ රඳවා තබන සිරකරුවන්ගේ අතක හෝ පාදයක ඉලෙක්ට්රොනික උපකරණයක් සවි කිරීම හරහා තාක්ෂණය ඔස්සේ ඔවුන් අධීක්ෂණය කළහැකිය. නිවාස අඩස්සියේ තබන සිරකරුවන් ඉන් පිටතට යන්නේ නම් තාක්ෂණය ඔස්සේ ඒ බව හඳුනාගෙන ඔවුන් බන්ධනාගාර වෙත යොමු කිරීමට හැකි බව බන්ධනාගාර කොමසාරිස් ජනරාල් තුෂාල උපුල්දෙනිය මහතා පවසනවා.
UN
