ශ්‍රී ලංකාවේ මහා පරිමාණ ආයෝජන ව්‍යාපෘති සඳහා තම ව්‍යාපාරිකයින් යොමු නොකිරීමට ඉන්දියාව තීරණය කර ඇති බව අභ්‍යන්තර ආරංචිමාර්ග පවසයි.
ඒ අනුව දැනට ක්‍රියාත්මක ව්‍යාපෘති සහ දැනට එකඟතාවන්ට පැමිණි ව්‍යාපෘති හැර අලුතින් ව්‍යාපෘති සඳහා ඉන්දීය ආයෝජකයින් මෙරටට නොඑවනු ඇති බව සඳහන්.
ශ්‍රී ලංකාවට ආයෝජන සම්බන්ධයෙන් ජාතික ප්‍රතිපත්තියක් නොමැති වීම සහ ආණ්ඩු මාරුවීමේදී ආයෝජන පිළිබඳ එකඟතාවන් ද වෙනස් වීම ඉන්දියාවේ මෙම තීරණයට හේතුවී ඇති බවත් ආරංචිමාර්ග ප්‍රකාශ කළේය.
කෙසේවෙතත් ශ්‍රී ලංකාවට ලබාදෙන මානුෂීය ආධාර කිසිදු වෙනසකින් තොරව මෙතෙක් පැවති ආකාරයටම ඉදිරියටත් ඉන්දියාව විසින් ලබාදෙනු ඇති බවත් ආරංචිමාර්ග පැවසීය.
මේ සම්බන්ධයෙන් ඉන්දියාවේ ප්‍රබලයකු ශ්‍රී ලංකාවේ ප්‍රබල දේශපාලනඥයකුට දැනුම් දී ඇති බවත් ආරංචිමාර්ග වැඩිදුරටත් සඳහන් කළේය.
