විදෙස් ගමන් තහනම් නෑ.. යනවා නම්, අධිකරණය දැනුවත් කරන්න.. මහේස්ත්‍රාත්වරයා කියයි.

හිටපු මහබැංකු අධිපති අජිත් නිවාඩ් කබ්රාල් මහතා සහ හිටපු ජනාධිපති ලේකම් ලලිත් වීරතුංග මහතාට විරුද්ධව තීනියාවල පාලිත හිමි විසින් ගොනු කරන ලද කොළඹ මහේස්ත්‍රාත් ඉදිරියේ පෞද්ගලික පැමිණිලි නඩු කටයුත්ත වෙනුවෙන් අද දිනයේදී අධිකරණය ඉදිරියේ ඔවුන් දෙදෙනා පෙනී සිටියා.

අජිත් නිවාඩ් කබ්රාල් මහතා වෙනුවෙන් ජනාධිපති නීතිඥ සම්පත් මෙන්ඩිස් ද ලලිත් වීරතුංග මහතා වෙනුවෙන් කාංචන රත්වත්තේ යන නීතීඥවරුන් පෙනී සිටියහ.

තිනියාවෙල පාලිත හිමියන් වෙනුවෙන් ජනාධිපති නීතිඥ මෛත්‍රී ගුණරත්න මහතා පෙනී සිටියේය.

මූලික විභාගයකින් පසුව මීළඟ අධිකරණ දිනය 2023 මාර්තු 21 දිනට ගරු තිළිණ ගමගේ මහෙස්ත්‍රාත් විසින් නියම කරන ලදී.

මෙහිදී, පැමිණිලිකරු පාර්ශ්වය විසින් විදේශ ගමන් තහනම් වගඋත්තරකරු දෙදෙනා වෙනුවෙන් පනවන ලෙස ඉල්ලා තිබුණද, අජිත් නිවාඩ් කබ්රාල් සහ ලලිත් වීරතුංග මහත්වරුන්ට විදෙස් සංචාරක තහනම් නොපනවනු ලදී. මහෙස්ත්‍රාත්තුමා විසින් පවසන ලද්දේ ඒ මහත්වරුන්ට විදේශගත වීමට අවශ්‍ය නම්, උසාවියට දන්වා එසේ කරන ලෙස ය.

තවද, සිතාසි නොලැබුණද අජිත් නිවාඩ් කබ්රාල් මහතා සහ ලලිත් වීරතුංග මහතා මෙලෙස අධිකරණයේ පෙනී සිටීම පිළිබඳ මහේස්ත්‍රාත් වරයා විසින් තම සතුට පළකරන ලදී.

නඩුව අවසන් වී, අධිකරණයෙන් පිටතට පැම්ණීමේදී මාධ්‍යවේදීන් නැගූ ප්‍රශ්න කීපයකට කබ්රාල් මහතා පිළිතුරු දුන්නේ මෙසේය:

මාධ්‍යවේදියා: ඔබතුමා අදත් උසාවියට ආවා නේද ?

පිළිතුර: ඔව් ආවා, එහෙත් අද නඩු ගැන නෙවෙයි, රට ගැන කතා කරමු නේද?

මාධ්‍යවේදියා: දැන් විදුලි බිල හොඳටම වැඩි කරලා. ඔබතුමා හිටියනම් විදුලි වැඩි කරන්නෙ නැද්ද ?

පිළිතුර: ඔබතුමන්ලා දන්නව ඇති මම ඉද්දි විදුලි බිද වැඩි කළාද නැද්ද කියලා. ඕක මගෙන් අහන්න ඕන ප්‍රශ්නයක් නෙමෙයි. අපි ගියාට පස්සේ එක පාරක් වැඩි කරා, දෙවැනි පාරත් වැඩි කරා.. දැන් ඉතින් සතුටුයිද කියලා අහන්න තමයි තියෙන්නේ.

මාධ්‍යවේදියා: ඇයි එහෙම වැඩි කරන්නේ? මොකක්ද ඒකට හේතුව?

පිළිතුර: වැඩි කරන අයගෙන්ම තමා ඒ ප්‍රශ්නය අහන්න තියෙන්නෙ. මම වැඩි කලේ නැති බව ඔයාලා දන්නවනේ.

මාධ්‍යවේදියා: ඔබතුමා IMF එකට ගියේ නැත්තේ ඔය හේතු නිසා ද ?

පිළිතුර: ඔව්. IMF එකට ගියාම වෙන දේ අපි දන්නවා. එතකොට ඒව ගැන දැනුවත්ව තමයි, IMF එකට යන්න ඕන. IMF එකට ගියාම මේ දේවල් වෙනවා කියලා මම දැනගෙන හිටියට, දැන් ඉන්න අය ඒ ගැන දැනගෙන ඉන්න නැතුව ඇති.

මාධ්‍යවේදියා: එහෙනම් දැන් දිගටම ලයිට් කපන්න වෙයිද දන්නේ නෑ නේද? දැන් ලයිට් බිල වැඩි කරාට පස්සේ විදුලිය කපන එක නතර කළානේ…?

පිළිතුර: ඔවු. දැන් ලයිට් බිල දැක්කහම කොහොමත් ලයිට් කැපෙයි.

ලෙස කබ්රාල් මහතා මාධ්‍යවේදීන්ට පිළිතුරු දුනි.

රෂිකා හෙන්නායක