2010 – 2014 සමයේ අමාත්‍යවරයකු ලෙස කටයුතු කරමින් සිටියදී සිය නීත්‍යානුකූල ආදායමින් උපයාගත නොහැකි රුපියල් මිලියන 75ක පමණ මුදල් හා වත්කම් උපයාගැනීම සම්බන්ධයෙන් අල්ලස් හෝ දූෂණ චෝදනා විමර්ශන කොමිසම විසින් පාර්ලිමේන්තු මන්ත්‍රී විමල් වීරවංශ මහතාට එරෙහිව ගොනුකර ඇති නඩුව ඊයේ (01) කොළඹ මහාධිකරණය හමුවේ කැඳවූ අවස්ථාවේදී ද විමල් වීරවංශ මහතා එහි පෙනී නොසිටි අතර ඔහුගේ නීතීඥවරුන් අධිකරණයට දැනුම් දුන්නේ ඔහු පාචනය, වමනය හා උණ රෝගී තත්වයකින් පෙළෙන බවයි.
එහිදී අල්ලස් කොමිසම වෙනුවෙන් පෙනී සිටි අතිරේක සොලිසිටර් ජනරාල් අයේෂා ජිනසේන මහත්මිය අධිකරණය හමුවී කරුණු දක්වමින් විත්තිකරු පසුගිය සැප්තැම්බර් මස 13 වන දා සිට අසනීප තත්ත්වයන් බව සඳහන් කරමින් අධිකරණය හමුවේ වරින් වර පෙනී නොසිටීම නිසා පූර්ව නඩු විභාග සම්මන්ත්‍රණය අවසන් කර ගැනීමට නොහැකි වී ඇති බවයි. ඒ අනුව, පූර්ව නඩු විභාග සම්මන්ත්‍රණය අවසන් කරගැනීම සඳහා දින නියම කරන ලෙසත් එදිනට අනිවාර්යයෙන්ම අධිකරණය හමුවේ පෙනී සිටින ලෙස විමල් වීරවංශ මහතාට නියෝගයක් නිකුත් කරන ලෙසත් ඒ මහත්මිය අධිකරණයෙන් ඉල්ලා සිටියාය.
මෙහිදී මහාධිකරණ විනිසුරු නවරත්න මාරසිංහ මහතා ද විත්තියේ නීතීඥවරුන්ට පෙන්වා දී ඇත්තේ විත්තිකරු වරින් වර අසනීප බව පවසමින් අධිකරණය හමුවේ පෙනී නොසිටීම නිසා පූර්ව නඩු විභාග සම්මන්ත්‍රණය අවසන් කරගැනීමට නොහැකි වී ඇති බවයි.
ඒ අනුව, නඩුව මාර්තු 22 වනදා නැවත කැඳවීමට නියෝග කළ විනිසුරුවරයා එදින අනිවාර්යෙන්ම අධිකරණය හමුවේ පෙනී සිටින ලෙස විත්තිකරුට සිතාසි නිකුත් කරන ලෙසත් නියෝග කළේය.
මෙම නඩුවට අදාළව අධිචෝදනා ගොනුකර ඇත්තේ 2016 වසරේදී වන අතර වසර අටක් තිස්සේ මෙහි පූර්ව නඩු විභාග සම්මන්ත්‍රණය හෝ අවසන් කරගැනීමට නොහැකි වී තිබේ.
RN
