සටහන – රුවන් නෙළුගොල්ල
ගනේමුල්ලේ සංජීව නමැති පාතාල නායකයා ඝාතනයට ලක්වූ දිනයේදී ඔහුව කොළඹ මහේස්ත්‍රාත් අධිකරණයට රැගෙන ආ ජේලර්වරයා කොළඹ අපරාධ කොට්ඨාසය විසින් අත් අඩංගුවට ගෙන තිබේ.
මෙසේ අත් අඩංගුවට ගෙන ඇත්තේ බූස්ස බන්ධනාගාරයේ සේවයේ නියුතු ජේලර්වරයකි.
ඔහුව අද (මාර්තු 17) කොළඹ අතිරේක මහේස්ත්‍රාත් හර්ෂණ කැකුණවල මහතා හමුවට ඉදිරිපත් කරන ලද අතර CCD නිලධාරීන් එහිදී පැවසුවේ මෙම ජේලර්වරයා තම රාජකාරිය පැහැර හැරීම නිසා මෙම අපරාධය සිදුවූයේදැයි විමර්ශන සිදුකරන බවයි.
එසේම ගනේමුල්ලේ සංජීවට වෙඩිතබා අධිකරණ මැදිරියෙන් පළාගිය සැකකරු අත් අඩංගුවට ගැනීම සඳහා මෙම බන්ධනාගාර නිලධාරියා විසින් කිසිදු පියවරක් ගෙන නොමැති බව විමර්ශනවලදී අනාවරණය වී ඇති බවත් CCD නිලධාරීහු එහිදී පැවසූ අතර සැකකාර ජේලර්වරයාගේ ජංගම දුරකථනයේ ඇමතුම් පිළිබඳ වාර්තාවක් කැඳවීමට අවසර දෙන ලෙසත් ඉල්ලා සිටියහ.
එම ඉල්ලීමට අධිකරණය අවසර ලබාදුන් අතර සැකකරු ලබන 21 වනදා දක්වා රක්ෂිත බන්ධනාගාරගත කිරීමට නියෝග කරන ලදී.
