සටහන: සශිකලා මධුෂාණි
මාර්තු 23; ලෝකය(අවුට්බවුන්ඩ් ටුඩේ) : ඊශ්‍රායලය විසින් ගාසා තීරයේ දකුණු දිග ඛාන් යුනිස් නගරයට එල්ල කරන ලද ගුවන් ප්‍රහාර හේතුවෙන් හමාස් සංවිධානයේ ඉහළ පෙළේ දේශපාලන නායක සලාහ් අල්-බර්ඩවීල් මියගොස් ඇති බව හමාස් සංවිධානය නිවේදනය කර තිබේ.
66 හැවිරිදි සලාහ් අල්-බර්ඩවීල් හමාස් සංවිධානයේ ඉහලම දේශපාලන නායකයා වශයෙන් සැලකෙන අතර ගුවන් ප්‍රහාර හේතුවෙන් බර්ඩවීල් සහ ඔහුගේ බිරිඳ යන දෙදෙනාම මිය යන්නට ඇති බව විශ්වාස කෙරේ.
ඛාන් යුනිස් සරණාගත කඳවුරේ උපත ලැබූ ඔහු හමාස් නායකයා වන සින්වාර් සමීපව සිටි බව දන්නා අතර ව්‍යාපාරයේ නිර්මාතෘවරුන් අනුගමනය කරමින් හමාස් නායකත්වයේ දෙවන පරම්පරාවේ කොටසක් ලෙස සැලකේ.
මාස දෙකකට ආසන්න කාලයක් පුරා පැවති සටන් විරාමය අවසන් කරමින් ඊශ්‍රායලය විසින් මෙම සතිය මුලදී ගාසා තීරයට දැඩි ප්‍රහාර එල්ල කිරීම නැවත ආරම්භ කළ අතර ප්‍රහාර හේතුවෙන් සිවිල් වැසියන් 400කට අධික පිරිසක් ද මියගොස් තිබේ.
