සටහන – රුවන් නෙළුගොල්ල
ශ්‍රී ලංකා ගුවන් හමුදාවට අයත් K-8 වර්ගයේ ප්‍රහාරක පුහුණු ජෙට් යානාවක් වාරියපොල ප්‍රදේශයට පසුගිය 21 වනදා කඩාවැටුණු අතර ඊට හේතුව එහි නියමුවන්ගේ අත්වැරදීමක් බව ප්‍රවාහන, මහාමාර්ග, වරාය හා සිවිල් ගුවන් සේවා අමාත්‍ය බිමල් රත්නායක මහතා පසුගිය ඉරිදා (23) ප්‍රකාශ කර තිබිණි.
මෙම සිද්ධිය සම්බන්ධ වාර්තාව තමන් ආරක්ෂක අමාත්‍යාංශයේ ලේකම්වරයා හරහා ගෙන්වා ගත් බවයි අමාත්‍යවරයා එහිදී ප්‍රකාශ කර තිබිණි.
කෙසේවෙතත් ගුවන් හමුදා මාධ්‍ය ප්‍රකාශක ගෘෘප් කපිතාන් එරන්ද ගීගනගේ මහතා ඊයේ (25) ප්‍රකාශ කළේ එම ගුවන් යානය කඩාවැටීමට හේතුව මෙතෙක් අනාවරණය වී නොමැති බවකි.
මෙම අනතුර සම්බන්ධයෙන් කරුණු සෙවීම සඳහා ගුවන් හමුදාපතිවරයා විසින් පත් කළ සත් පුද්ගල කමිටුවේ වාර්තාව මේ දක්වා නිකුත් කර නොමැති බවත් ගුවන් හමුදා මාධ්‍ය ප්‍රකාශකවරයා සඳහන් කළේය.
ඒ අනුව මෙම අනතුරට හේතුව කුමක්ද යන්න තවමත් ප්‍රකාශ කළ නොහැකි බවත් ඔහු පැවසීය.
