සටහන – පුලී
මාර්තු 28, ලෝකය (අවුට්බවුන්ඩ් ටුඩේ): එක්සත් ජනපද භූ විද්‍යා සමීක්ෂණ ආයතනයට (USGS) අනුව මියන්මාරයට රික්ටර් මාපකයේ 7.7 සහ 6.4 ක භූමිකම්පා තත්ත්වයක් ඇති වී ඇති බව විදෙස් මාධ්‍ය වාර්තා කරයි.
තායිලන්තයේ සහ කලාපයේ වෙනත් ස්ථානවල ප්‍රබල කම්පන තත්ත්වයන් ඇති වී ඇති අතර, පළමු කම්පනය සිකුරාදා(අද) දේශීය වේලාවෙන් දහවල් 12:50 ට පමණ (GMT 06:20) සාගිං නගරයේ සිට කිලෝමීටර් 16 ක් (සැතපුම් 10) වයඹ දෙසින් කිලෝමීටර් 10 ක් ගැඹුරට සිදු වූ බව එක්සත් ජනපද භූ විද්‍යා සමීක්ෂණ ආයතනය පවසයි.
මෙම කම්පන තත්ත්වයන්ගෙන් මාර්ග අවහිර වී ඇති බවත් ගොඩනැගිලිවලින් සිවිලිම් කැබලි කඩා වැටී ඇති බවත් වාර්තා විය.
අසල්වැසි තායිලන්තයේ අගනුවර වන බැංකොක්හි, කම්පනයට පත් පදිංචිකරුවන් උස් ගොඩනැගිලිවලින් පිටතට පැමිණෙන අයුරුද දැකගත හැකි විය.
බැංකොක්හි චතුචක් ප්‍රදේශයේ ඉදිවෙමින් පවතින ගොඩනැගිල්ලක සුන්බුන් අතර පුද්ගලයින් සිරවී සිටින බවට ද වාර්තා වන අතර බැංකොක්හි මෙට්‍රෝ සහ සැහැල්ලු දුම්රිය සේවා කිහිපයක් ද අත්හිටුවන ලදී.
