කොළඹ LNW:තරුණ සේවා සභාවේ පසුගිය සමයේ සිදුවූ වංචා හා දූෂණ පිළිබඳව කෝප් කමිටුවේදී හෙළිවූ කරුණුවලට අදාළව එම වාර්තාව සහ හිටපු ඇමතිවරයා සම්බන්ධයෙන් ද එල්ල වී ඇති චෝදනා පිළිබඳ කෝප් කමිටු වාර්තාව පාර්ලිමේන්තුවට ඉදිරිපත් කිරීමෙන් අනතුරුව නීති ක්‍රියාමාර්ග ගැනීමට නීතිපතිවරයාට අදාළ වාර්තා යොමු කිරීමට කෝප් කමිටුව තීරණය කර තිබේ.
ජාතික තරුණ සේවා සභාවේ නිලධාරීන් ගෙන්වා කරන ලද ප්‍රශ්න කිරීම්වලදී රනිල් වික්‍රමසිංහ රජය සමයේ එම ආයතනයේ මුදල් අවභාවිත කිරීම පිළිබඳ සිද්ධි රැසක් හෙළිවී තිබුණි.
නියමිත ආයතන පටිපාටියෙන් බැහැරව එහි කටයුතු සිදුව තිබුණු අතර ඇතැම් නිලධාරීන් එම තත්ත්වයන් වසන් කිරීමටද උත්සහ දරන ආකාරය පෙනෙන්ට තිබුණු අතර ඇතැම් නිලධාරීන් බලපෑම් මත ක්‍රියාත්මක වූ ආකාරයද අනාවරණය විය.
කෝප් කමිටුවේදී අනාවරණය වූ කරුණු අනුව වගකීම් විරහිත නිලධාරීන්ගේ වැඩතහනම් කර ඔවුන් පිළිබඳ දීර්ඝව පරීක්ෂණ කිරීමට වර්තමාන තරුණ කටයුතු අමාත්‍යාංශයේ ලේකම්‍වරයාට උපදෙස් ද දී ඇති බව සඳහන්.
ආශිකා බ්‍රාහ්මණ
