රෂිකා හෙන්නායක අප්‍රේල් 03,කොළඹ LNW :
රටක් වශයෙන් දියුණු වෙන්න අවශ්‍ය නම් ආසියාව සමග තරග කිරීමට අවශ්‍ය බවත්, බංකොලොත් වුණු රටක් රනිල් වික්‍රමසිංහ ජනාධිපතිතුමා විශාල කැපවීමක් කර අද තිබුණු තත්ත්වයට ගෙන ආ බවත් එක්සත් ජාතික පක්ෂයේ සභාපති වජිර අබේවර්ධන මහතා පවසයි.
අගමැති මෝදි සහ රනිල් වික්‍රමසිංහ ජනාධිපතිතුමා අත්සන් කළ රාජ්‍ය තාන්ත්‍රික ගිවිසුම් තවදුරටත් ආරක්ෂා කරමින් ඉදිරියට යන්නේ නම්,රජය ඒවා ක්‍රියාත්මක කරන්නේ නම්. එක්සත් ජාතික පක්ෂය පූර්ණ සහයෝගය රජයට ලබාදෙන බවද ඒ මහතා කියා සිටී.
ඉකුත් දිනවල උතුරු නැගෙනහිර පළාත්වල පැවතී විශේෂ රැස්වීමි කිහිපයකට සහභාගී වෙමින් වැඩි දුරටත් ඒ මහතා මෙලෙස අදහස් පළ කළේය,
“නරේන්ද්‍ර මෝදි අගමැතිතුමා, රනිල් වික්‍රමසිංහ ජනාධිපතිතුමා අත්සන් කළ රාජ්‍ය තාන්ත්‍රික ගිවිසුම් තවදුරටත් ආරක්ෂා කරමින් ඉදිරියට ගෙනියන්න.
රජය ඒවා ක්‍රියාත්මක කරන්නේ නම් එක්සත් ජාතික පක්ෂය පූර්ණ සහයෝගය රජයට ලබාදෙනවා, මෙවර පළාත් පාලන මැතිවරණයේදී උතුරු නැගෙනහිර පළාත් පාලන ආයතන සදහා තරඟ කරන එක්සත් ජාතික පක්ෂ අපෙක්ෂකයින් සමග විශේෂ රැස්වීම් කිහිපයක් මේ වනවිට අපි පවත්වමින් තිබෙනවා. එහි තුන්වෙනි රැස්වීම එහෙමත් නැතිනම් යාපනය දිස්ත්‍රික්කයේ පළාත් පාලන ආයතන සඳහා තරඟ කරන අපෙක්ෂක හමුව තමයි අද මේ පැවැත්වෙන්නේ.
ඉතින් මෙවර පළාත් පාලන ආයතනවලට තරඟ කරන ඔබ අපේ පක්ෂයේ නායකතුමාගේ සහ පක්ෂයේ දේශපාලන ස්ථාවරය අවබෝධත කරගත යුතුයි. ඒ වගේම ඒ ස්ථාවරය පිළිබඳ ඔබ ගමින් ගමට ගොස් ජනතාව දැනුවත් කර යුතුව තිබෙනවා. ඒ නිසා මම ඔබට ඒ ගැන දැනුවත් කිරීමට මෙය අවස්ථාවක් කර ගන්නවා.
ඊයේ රනිල් වික්‍රමසිංහ Viii වැනි විධායක ජනාධිපතිතුමා මාධ්‍යයට විශේෂ ප්‍රකාශයක් කළා. ඒ ප්‍රකාශයේ සඳහන් කර තිබෙන්නේ, මෝදි අගමැතිතුමා නායකත්වය දරණ ඉන්දීය රජය සමග රනිල් වික්‍රමසිංහ ජනාධිපතිතුමා නායකත්වය දුන් පසුගිය රජය අත්සන් කළ ගිවිසුම් තවදුරටත් ආරක්ෂා කරන්න කියලා. ඒවා හේතුවක් නැතිව කඩා දමන්න එපා කියලත් එතුමා ප්‍රකාශ කර තිබෙනවා.
විශේෂයෙන්ම අපේ ආණ්ඩුව පුනර්ජනනීය බල ශක්තිය සම්බන්ධයෙන් යෝජනා ගණනාවක් අනුමත කළා. අප ඒ වැඩ කටයුත්ත කළේ මේ රටට බලශක්තිය වුවමනා වූ නිසයි. එම විදේශ ආයෝජන සමග රටේ අලුත් ආයෝජන ඇති කිරීමට ඒ බලශක්ති යෝජනා ක්‍රම සඳහා විදේශ ආයෝජන ලැබුණා. ඩොලර් බිලියන දෙකක් හෝ දෙක හමාරක පමණ ව්‍යාපෘති ඒ අනුව අපේ රජය අනුමත කළා.
ඒ වගේම අදානි සමාගම සහ හේලීස් සමාගම සම්බන්ධයෙන්ද මුදල් අමාත්‍යාංශයෙන් ව්‍යාපෘති කොමිටියක් පත් කළා. ඊට පසුව මේ සමාගම් සමග ගනුදෙනු කිරීම සඳහා කැබිනට් මණ්ඩලයෙන් ව්‍යාපෘති පිළිබඳ සාකච්ඡා කොට තීරණ ගැනීමේ කමිටුවක් පත් කළා. අන්තිම මිල තීරණය කළේ ඒ අයගේ වාර්තා අනුවයි.
හේලිස් සමාගමේ ව්‍යාපෘතිය මෙගා වොට් පනහක් වුණා. එහි අදානි ව්‍යාපෘති අතර වෙනසක් තිබෙනවා. ඊට හේතු ගණනාවක් තිබෙනවා. ඒ සියලු හේතු අධ්‍යයනය කරන්නට ආණ්ඩුවට පුළුවන්.පළමුවෙන්ම තිබුණේ සංක්‍රමණික පක්ෂීන් පිළිබඳ අධ්‍යයනයයි. පක්ෂීන් පැමිණීමට පරිසර තත්ත්වයන් හානි විය හැකියි. මේ සඳහා මන්නාරමේ තිබෙන හේලීස් ව්‍යාපෘතියට රජයෙන් අධ්‍යයනය කර තිබුණා. අදානි සමාගමට මුදල් ගෙවා එය කරන්නට සිදුවුණා.දෙවැනිව තිබුනේ භූමිය ලබා ගැනීමයි. භූමිය ලබා ගැනීමේදී තීරණය කළේ විදුලි බල මණ්ඩලයේම භූමිය මන්නාරමට ලබාදීමයි. එය හේලීස් සමාගමට ලැබුණා. අදානි සමාගමට එම භූමිය මිල දීලා ගන්නට සිදුවුණා.
මන්නාරම පිළිබඳ සක්‍යතා අධ්‍යයනයක් විදුලි බල මණ්ඩලයෙන් සිදුකර තිබුණා. නමුත් අදානිට අලුතින් ඊට ගෙවන්නට තිබුණා. එමෙන්ම මන්නාරම වෙනුවෙන් බල ශක්ති බලපත්‍රය විදුලි බල මණ්ඩලයෙන් ක්‍රියාත්මක කර තිබුණා. අදානිට මුදල් ගෙවා එම වැඩකටයුත්ත කරන්නට තිබුණා. බෙදා හැරීමේ ජාලයත් අන්තිම සැතැක්ම සමග සම්බන්ධ කිරීම බැලූ විට යටිතල පහසුකම් එකක්වත් අදානි ව්‍යාපෘතියේ තිබුණේ නැහැ.මේ සියල්ලම මන්නාරම ව්‍යාපෘතියේ ඒ අයට දෙන්න අප සකස් කර තිබුණා. නිලධාරීන් දුන් වාර්තා අනුව පිළිගෙන මේ ව්‍යාපෘති දෙක මෙන්ම අනික් ඒවා අප අනුමත කළා. හැම එකේම මිල වෙනස්.
ඉතින් මේ ව්‍යාපෘති හිටි හැටියේ නතර කරනවා නම් ඊට හේතු මොනවාද කියා දැනගත යුතුයි. නැතිනම් චෝදනා හැම පැත්තකටම යනවා. මුදල් දුන්නා, සල්ලිවලට වැඩ කළා කියනවානම් සල්ලි දෙන්නේ කවුදැයි කිව යුතුයි. සල්ලි දෙන්නේ අදානි ද? මේ කියන්නේ අදානි සමාගම ලංකාවේ සහ ඉන්දියාවේ නීති කඩා තිබෙනවාද? වර්තමාන රජය චෝදනා කරන්නේ එයද?
දැන් මෝදි අගමැතිතුමා හෙට ලංකාවට එනවා. අපි රටක් වශයෙන් දියුණු වෙන්න අවශ්‍ය නම් අපි ආසියාව සමග තරග කරන්න ඕන. දැන් එහෙම අත්සන් කළ ගිවිසුම් කවුරුහරි අවලංගු කළොත් ලෝකයේ කිසිම රටක් අපිව විශ්වාස කරන්නේ නෑ. ජාත්‍යන්තර අපි ගැන තිබූ විශ්වාසය මුළුමනින්ම බිඳ වැටෙනවා. මෙය රටට ඉතා අහිතකර තත්ත්වයක්. බංකොලොත් වුණු රටක් රනිල් වික්‍රමසිංහ ජනාධිපතිතුමා විශාල කැපවීමක් කරලා තමයි අද තිබුණු තත්ත්වයට ගෙන ආවේ.
ඉතින් දැන් මේ ඩොලර් බිලියන 2ක අවලංගු කළොත් නැවත කොහෙන්ද ඒවා හොයාගන්නේ? අපිට වතුර බොන්න වෙන්නෙත් නෑ. ඉඩම් ගන්න වෙන්නෙත් නෑ. අලි වැට හදාගන්න වෙන්නෙත් නෑ. නළ ලිං හදාගන්න වෙන්නෙත් නෑ. නැවත වරක් අපි රටක් ලෙස දුප්පත් වෙනවා.
දැන් ඒ නිසා තමයි අපේ පළාත් පාලන අපේක්ෂකයෝ ගෙවල්වලට ගියාම කියන්න ඕන එක්සත් ජාතික පක්ෂය පහුගිය අවුරුදු දෙක හමාරේ හදලා තිබෙනවා අලුතින් නීති පනත් 92ක්. ඒවාට විරුද්ධව අද ඉන්න පාලකයේ උසාවි ගියා. දැන් උසාවි යන්න ඕන නෑ. උදේට පාර්ලිමේන්තුව කැඳෙව්වා, අත ඉස්සුවා ඔක්කොම අවලංගු කළා. එහෙම අවලංගු කරන්න බැරි නම් එයාලා කියලා තියෙන්නේ බොරු. මේ බොරුව හින්දා තමයි රට වැටිලා තියෙන්නේ. ඔබ ගෙවල්වලට ගියාම මේ දේවල් කියලා දෙන්න.
2022, 2023 අපි ඉන්දියාව සමග කර තිබෙන ගණුදෙනු ආරක්ෂා කරගෙන ඉදිරියට යන්න එක්සත් ජාතික පක්ෂය පූර්ණ සහයෝගය ආණ්ඩුවට දෙනවා. ඒවා කඩාකප්පල් කරලා රට බිම දාන්න එපා. යම් කිසි විදිහකින් නැවත රට වැටුණොත් දුක් විඳින්නට සිදුවන්නේ මේ රට සියලුම මහජනයාට බව ඔබ මතක තබා ගත යුතුයි.”
