සටහන – රුවන් නෙළුගොල්ල
විපක්ෂ නායක සජිත් ප්රේමදාස මහතා පසුගියදා (05) මෙරට සංචාරයක නිරත වී සිටි ඉන්දීය අග්රාමාත්ය නරේන්ද්ර මෝදි මහතා හමුවූ අවස්ථාවේදී ඒ මහතාට විශේෂ ත්යාගයක් පිරිනැමීමට කටයුතු කර තිබිණි.
ඒ, මෙරට සුවිශේෂී පාරිසරික සම්පතක් වන දිවියකුගේ ඡායාරූපයකි.
මේ සම්බන්ධයෙන් විපක්ෂ නායකවරයා සිය ෆේස්බුක් පිටුවෙහි තබා ඇති සටහන පහතින් දැක්වේ.
(සජිත් ප්රේමදාස මහතා දීර්ඝ කාලයක් තිස්සේ වනජීවී ඡායාරූපකරණයෙහි නියැළෙන අයෙකු වන අතර ඒ මහතා සතුව මෙරට විශාලතම වනජීවී ඡායාරූප එකතුවක් ද පවතී. )
විල්පත්තු ජාතික උද්යානයේ එක් ඇසක පෙනීම නැති අයි-වන් (eye-one) වශයෙන් හදුන්වන ගැහැණු දිවියෙකුගේ (female Sri Lankan Leopard: Panthera pardus kotiya) මෙම විශේෂ ඡායාරූපය, 2025 අප්රේල් 5 වන අද දින, ඉන්දියානු අග්රාමාත්ය අතිගරු ශ්රී නරේන්ද්ර මෝදි මහතාට කොළඹදී පිළිගැන්වීමට ලැබීම ඉමහත් ගෞරවයකි.
එක් ඇසක පෙනීම අහිමි වුවද, වනාන්තරයේ අභියෝග ජයගනිමින් සාර්ථකව ජීවත් වන මෙම සුවිශේෂී සත්වයා — ශ්රී ලංකාවේ ස්වාභාවික උරුමයේ සහ සෞන්දර්යයේ සැබෑ සංකේතයකි.
ඇගේ ආකර්ෂණීය නිල් ඇස අභියෝගවලට මුහුණ දෙමින් ඇයගේ පැවැත්ම පිළිබඳව දීර්ඝ කතාවක් පවසයි — සමහරවිට ග්ලූකෝමා, කැටරැක්ට්, හෝ යම් අනතුරකට භාජනය වීම නිසා ඇතිවුන තත්ත්වයකි— එහෙත් ඇය වනාන්තරයේ ආරක්ෂාකාරීව නොසැලී සිටීම වනසත්ව ලෝකයේ අභියෝග ජය ගැනීමේ සංකේතයකි.
කෙසේවුවද අවාසනාවන්ත ලෙස මෙම සුවිශේෂී සත්වයා පසුගිය වසර කිහිපයක සිටම දක්නට නොලැබුණ අතර ජීවත්ව සිටිනවාද යන්න සනාථ ගැනීමට නොහැකිව ඇත.
