සටහන – රෂිකා හෙන්නායක
අප්රේල් 08 , ලෝකය (අවුට්බවුන්ඩ් ටුඩේ): ඉන්දීය මහමැතිවරණයෙන් පසු බංග්ලාදේශයේ අගමැතිනිය ශෙයික් හසීනා එරට සංචාරය කිරීමට නියමිත බව බංග්ලාදේශ විදේශ කටයුතු ඇමැති හසන් මහමූද් ප්රකාශ කර ඇතැයි වාර්තා වේ.
මේ මස 19 වැනිදා ආරම්භ වී ලබන ජුනි මස 1 වැනිදායින් නිමාවට පත් වන ඉන්දීය මහමැතිවරණයෙන් පසු මේ සංචාරය සිදු කිරීමට නියමිත බවත්, ඒ සඳහා දින වකවානුව මෙතෙක් ප්රකාශයට පත් වී නැති බවත් විදෙස් මාධ්ය සඳහන් කළේය.
පසුගිය ජනවාරි 7 වැනිදා බංග්ලාදේශ මහමැතිවරණයෙන් ශෙයික් හසීනා පස්වැනි වරටත් එරට අගමැති ධුරයට පත්වීමෙන් පසු ඉන්දියාවේ සංචාරය කරන පළමු අවස්ථාව එය වනු ඇත.
බංග්ලාදේශ විදේශ කටයුතු ඇමැතිවරයා ප්රකාශ කර ඇත්තේ, දෙරට අතර රාජ්යතාන්ත්රික සබඳතා තවදුරටත් ශක්තිමත් කිරීමට සහ නව සබඳතා ගොඩනඟා ගැනීමට ශෙයික් හසීනාගේ ඉන්දීය සංචාරය අතිශය වැදගත් වනු ඇති බවයි.
