ආන්දෝලනාත්මක පාර්ටිගේට් සිදුවීමට අදාළව බ්‍රිතාන්‍යයේ අග්‍රාමාත්‍ය බොරිස් ජොන්සන්, ඔහුගේ බිරිඳ කැරී ජොන්සන් සහ චාන්සල්වරයකු වන රිෂී සුනාක්ට දඩ නියම කිරීමට කටයුතු කර ඇති බව වාර්තා වනවා.
මීට වසර එක හමාරකට පමණ ඉහත බ්‍රිතාන්‍යයේ කොවිඩ් අවදානම ඉහළ ගොස් තිබූ වාතාවරණයක පනවා තිබූ සෞඛ්‍ය විධිවිධාන අමුඅමුවේ උල්ලංඝනය කරමින් නො.10 ඩවුනිං වීදියේ තම කාර්යාලයේ රජයේ නිලධාරීන් කිහිපදෙනෙකු සමඟ සාද මාලාවක් පැවැත්වීමට අදාළවයි එම දඩයන් පැනවීමට කටයුතු කර තිබෙන්නේ.
ලොක්ඩවුන් නීති උල්ලංඝනය කිරීමට විරුද්ධව මෙම දඩයන් පැනවෙන බව බොරිස් ජොන්සන් අග්‍රාමාත්‍යවරයා, ඔහුගේ බිරිඳ කැරී සහ චාන්සල් රිෂී වෙත දැනුම් දී තිබෙනවා. එමෙන්ම, මෙම දඩයන් පිළිබඳව තහවුරු කරමින් නො. 10 ඩවුනිං වීදියේ කාර්යාලය විසින් ද නිවේදනයක් නිකුත් කර තිබෙනවා.
ඒ අනුව, බොරිස් ජොන්සන් අග්‍රාමාත්‍යවරයා නීතිය කඩකිරීමේ චෝදනාවට වරදකරු වන බ්‍රිතාන්‍යයේ පළමු අග්‍රාමාත්‍යවරයා ලෙස ඉතිහාසගත වනවා.
මීට අදාළව කැබිනට් විමර්ශනයක් දියත් කර තිබූ අතර, මෙට්‍රොපොලිටන් පොලීසිය විසින් ද දීර්ඝ විමර්ශනයක් දියත් කර තිබුණා. බොරිස් ජොන්සන් අග්‍රාමාත්‍යවරයා ඇතුළු රජය නියෝජනය කරන නිලධාරීන් අතින් ‘සාධාරනීකරණය කිරීමට නොහැකි’ අන්දමේ වරදක් සිදුව ඇති බවට පළමු වරට නිගමනය කළේ කැබිනට් විමර්ශනයයි. මෙම විමර්ශනය සිදුකරනු ලැබුවේ ජ්‍යෙෂ්ඨ සිවිල් සේවිකා සූ ග්‍රේ මහත්මිය විසින්. ඇගේ වාර්තාව බ්‍රිතාන්‍ය පාර්ලිමේන්තුව උණුසුම් කරනු ලැබුවා පමණක් නොවෙයි, දක්ෂිණාංශික දේශපාලනයේ සැඟවුනු රකුසා එළියට මතුකිරීමට පවා සමත් වුනා.
කියවන්න: සුනිල් පෙරේරාට ගීතය වැරදුනා වත් ද? ප්‍රජාතන්ත්‍රවාදයේ තක්කඩියා හෙවත් බොරිස් ජොන්සන් ලංකාවේ පොරක් ද?
පාර්ටිගේට් සිදුවීම වටා ගෙතුනු සියලු චෝදනා මුල දී බොරිස් ජොන්සන් විසින් ප්‍රතික්ෂේප කර තිබුණා. අනතුරුව ඒ පිළිබඳව ප්‍රශ්න කළ පාර්ලිමේන්තු මන්ත්‍රීවරුන්ට පිළිතුරු සපයනු වෙනුවට විපක්ෂයට තඩි බෑමේ තක්කඩි දක්ෂිණාංශික කලාව ඔහු විසින් නිරූපණය කරමින් තිබුණා. ඉන් ද අනතුරුව මෙට්‍රොපොලිටන් පොලීසියේ විමර්ශන අවසාන වනතුරු සියල්ල ඉවසා වදාරන ලෙස ඔහුගෙන් ප්‍රශ්න කළ සෑම දෙනෙකුටම බොරිස් ජොන්සන් පවසා තිබුණා.
මෙම සිදුවීම බ්‍රිතාන්‍යය තුළ දේශපාලන අස්ථාවරභාවයක් ඇතිකරවීමේ අවදානමක් මතුකරන තත්ත්වයටම උත්සන්න වූයේ විපක්ෂය පමණක් නොව පාලක පක්ෂය වූ බ්‍රිතාන්‍ය කන්සර්වේටිව් පක්ෂයෙන් ද විවේචන එල්ල වීම ආරම්භ වූ මොහොතේ පටන්. එමෙන්ම, බ්‍රිතාන්‍ය පරිපාලන අංශයේ බොහෝ රාජ්‍ය නිලධාරීන් මෙම සිදුවීම නිසා ඉල්ලා අස්වූවා. මේ අතර මුනිරා මිර්සා ගේ ඉල්ලා අස්වීම වඩාත් කැපී පෙනුනා. බොරිස් ජොන්සන් ගේ දකුණු අත මෙන් වූ, බොරිස් ජොන්සන් ම පවසන පරිදි ඔහුගේ මණ්ඩලයේ ප්‍රභලතම කාන්තාවන් පස්දෙනාගෙන් එක් අයෙකු වූ මුනිරා තම ඉල්ලා අස්වීම සමඟ බොරිස් ජොන්සන් ගේ ක්‍රියාකලාපය පිළිබඳ දැඩි කලකිරීම ප්‍රකාශ කර සිටියා. තත්ත්වය තවත් බරපතල කරමින් බොරිස් ජොන්සන් අග්‍රාමාත්‍යවරයාට එරෙහිව විශ්වාසභංග ලිපි ඉදිරිපත් වීම ද ඇරඹුනා.
කියවන්න:
ප්‍රජාතන්ත්‍රවාදය දැඩි සත්කාර ඒකකයේ – බොරිස් ජොන්සන් දැන්ම ඉඳන් සුදුකොඩි එල්ලනවා ද?
පාර්ටිගේට් ජරමරය: සොරි කියපු බොරිස් ජොන්සන්ට මෙට්‍රොපොලිටන් පොලීසියෙන් නෛතික ප්‍රශ්නමාලාවක්!
නමුත් බොරිස් ජොන්සන්ට පොඩි ඉල්ලමක් පෑදුනු අන්දම ඔබට මතක ඇති. රුසියානු – යුක්රේන යුද්ධය ඇරඹුනා. මෙහිදී බ්‍රිතාන්‍යය කොන්දේසි විරහිතව යුක්රේන පාර්ශවය සමඟ හිටගත්තා. රුසියානු ජනපති ව්ලැද්මිර් පුටින්ට එරෙහිව පාර්ලිමේන්තුව තුළ හා ඉන් පිටත ප්‍රකාශ කරමින් යුක්රේනයට සහාය පළ කිරීමේ මෙහෙයුම ඔහු ආරම්භ කළා. යුක්රේනයට මානුෂීය ආධාර සැපයීමට බ්‍රිතාන්‍යය පියවර ගත්තා; රුසියාවට එරෙහිව සම්බාධක පැනවීමට තීරණය කළා. පාර්ටිගේට් ජරමරය නිසා දුෂ්ටයකු වූ දක්ෂිණාංශික දේශපාලනයේ තක්කඩියකු වූ බොරිස් ජොන්සන් එක රැයින් වීරයකු බවට පත්වූවා.
කියවන්න:
යුක්රේනයේ වලි නේ, ඉතිං අපි පාර්ටිගේට් විමර්ශන අතාරිමු!
පාර්ටිගේට් ජරමරය: සද්දයක් නැති මෙට්‍රොපොලිටන් පොලීසිය රුසියාවේ ඔත්තුකාරයෙක් ද?
පාර්ටිගේට් ජරමරයට අදාළව මෙසේ විවිධ අවස්ථාවන් වල පුවත් මතුවුනා. බොරිස් ජොන්සන් අග්‍රමාත්‍යධුරයෙන් ඉල්ලා අස්විය යුතු බවට මතවාදයක් එක් පසෙකින් තැනෙද්දී, යුක්රේන අර්බුදය නිසා යුරෝපීය කලාපය තුළ බ්‍රිතාන්‍යයේ නියෝජනය තිබිය යුතු බැවින් බොරිස් ජොන්සන් තවදුරටත් ධුරයේ සිටිය යුතු බවට තවත් පසෙකින් මතවාදයක් තැනුනා. බොරිස් ජොන්සන් ට පක්ෂපාතී මාධ්‍ය විසින් යුක්රේන අර්බුදය නිසා පාර්ටිගේට් විමර්ශන නවතා දැමිය යුතු බවට ද මතවාදයක් නිර්මාණ කිරීමට උත්සාහ කළා.
කෙසේවෙතත්, දැන් මෙට්‍රොපොලිටන් පොලීසිය තම විමර්ශනය හරහා බොරිස් ජොන්සන් වරදකරු බව ප්‍රකාශයට පත්කර තිබෙනවා.
දඩ ගහපු නිසා වරද පිළිගෙන…?
බොරිස් ජොන්සන් මෙම සිදුවීමට අදාළව සමාව භජනය කර ඇති බවයි අද (13) දින පළවු විදෙස් මාධ්‍ය වාර්තා කරන්නේ. කෙසේ වෙතත් ඔහු තම ධුරයෙන් ඉල්ලා අස්නොවන බව ද ප්‍රකාශ කර තිබෙනවා.
බොරිස් ජොන්සන් අග්‍රාමාත්‍යවරයා විටින් විට පවසා සිටියේ මෙට්‍රොපොලිටන් පොලීසියේ විමර්ශනය අවසාන වන තුරු මේ පිළිබඳව කිසිවක් ප්‍රකාශ කළ නොහැකි බවයි. දැන් මෙට්‍රොපොලිටන් පොලීසිය සිය නිගමනය ප්‍රකාශයට පත්කර ඇති බැවින් බොරිස් ජොන්සන් පවසන්නේ මෙවන් දෙයක්..
“මීට අදාළ දඩය මා විසින් ගෙවනු ලැබුවා, නැවත වරක් මම සම්පූර්ණයෙන් සමාව අයැද සිටිනවා. මට අවශ්‍ය වන්නේ මට ලැබී ඇති ජනවරමට අනුව කටයුතු කිරීම පමණක් නොවෙයි, මේ මොහොතේ රට මුහුණ පාන ප්‍රශ්නවලට මුහුණ දීමටත් මට අවශ්‍ය වනවා. මේ රටේ ජනතාව වෙනුවෙන් නැඟී සිටීම සහ එය ලබා දීම මගේ කාර්යය බව මම විශ්වාස කරනවා. මම කරන්න යන්නේ එයයි.”
පාර්ටිගේට් සිදුවීම සම්බන්ධයෙන් ගොනුවූ චෝදනා මුලදී තරයේ ප්‍රතික්ෂේප කළ බොරිස් ජොන්සන් වරින් වර පුන පුනා කියා සිටියේ සියලු කොවිඩ් විධිවිධාන නිසි පරිදි අනුගමනය කළ බවයි. දැන් පවසන්නේ එදා සාදයට සහභාගී වූ මොහොතේ තමා කොවිඩ් විධිවිධාන උල්ලංඝනය කරන බව තමාට අවංකවම නොවැටහුනු බවයි. ඒ අනුව තමා කොවිඩ් විධිවිධාන උල්ලංඝනය කරමින් මෙම සාදයට සහභාගී වූ බවට බොරිස් ජොන්සන් අග්‍රාමාත්‍යවරයා දැන් පවසනවා.
ඒ අනුව තමා කොවිඩ් විධිවිධාන උල්ලංඝනය කළ බව දඩයක් නියම වන තුරුම නොවැටහීමට බොරිස් ජොන්සන් එතෙක් සිහිවිකල්ව සිටියා විය යුතු ය.
විරෝධය දිගටම..
බොරිස් ජොන්සන් අග්‍රාමාත්‍යවරයාට එරෙහිව ගොඩනැඟෙන විරෝධය උත්සන්න වී ඇතිබවක් තමයි දැන් පෙනෙන්නට තිබෙන්නේ. යුක්රේන අර්බුදයයි පාර්ටිගේට් විමර්ශන අවසන් වනතුරු මෙට්‍රොපොලිටන් පොලීසිය පවත්වා ගත් නිහඬ බවයි මැද මේ විරෝධතා වලට යම් නොනගත කාලයක් ලැබුණු මුත් දැන් යළිත් දේශපාලන පිටිය උණුසුම් වන බවක් දක්නට ලැබෙනවා.
ශ්‍රීමත් කියර් ස්ටාමර් ප්‍රමුඛ බ්‍රිතාන්‍ය කම්කරු පක්ෂය දිගින් දිගටම බොරිස් ජොන්සන් අග්‍රාමාත්‍යවරයා සහ චාන්සල් රිෂී සුනාක් ට ඉල්ලා අස්වන ලෙස බලකර සිටිනවා. ලිබරල් ඩිමොක්‍රටික් පක්ෂ නායක ශ්‍රීමත් එඩ් ඩේව් අග්‍රාමාත්‍යවරයා කෙරෙහි ඇති විශ්වාසය පරීක්ෂා කිරීම සඳහා පාර්ලිමේන්තුව යළි කැඳවන ලෙස බලකර සිටිනවා.
නමුත් මෙම විරෝධය තුළ වඩාත් කැපී පෙනෙනම විරෝධය මතුවන්නේ නිකෝලා ස්ටර්ජන් සහ මාර්ක් ඩ්‍රේක්ෆෝර්ඩ් ගෙන්. නිකෝලා ස්කොට්ලන්තයේ ප්‍රථම අමාත්‍යවරිය වන අතර මාර්ක් වේල්සයේ ප්‍රථම අමාත්‍යවරයායි. එම දෙපාර්ශවයම බොරිස් ජොන්සන් අග්‍රාමාත්‍යවරයාට ධුරයෙන් ඉල්ලා අස්වන ලෙස බලකර සිටිනවා. එම විරෝධය බොරිස් ජොන්සන්ට ඉතාමත් තීරණාත්මක වනු ඇති.
මේ අතර ස්කොට්ලන්ත ජාතික පක්ෂය ද පාර්ලිමේන්තුව යළි කැඳවා සිටින ලෙස බලකර සිටිනවා.
මෙට්‍රොපොලිටන් විමර්ශනයේ සම්පූර්ණ සොයාගැනීම් සහ වාර්තා තවමත් ප්‍රකාශයට පත්කර නැහැ. බොරිස් ජොන්සන් අග්‍රාමාත්‍යවරයා, ඔහුගේ බිරිඳ කැරී ජොන්සන් සහ චාන්සල් රිෂී සුනාක්ට එරෙහිව දඩ නියම කිරීමක් පමණයි සිදුව තිබෙන්නේ. නමුත්, මෙම පාර්ටිගේට් ජරමරයට පාර්ශව ගණනාවකගේ සබඳතා ඇති බවට සාක්ෂි ගොනුවී තිබෙනවා.
මෙට්‍රොපොලිටන් අවසන් වාර්තාව නිකුත් වී බ්‍රිතාන්‍ය පාර්ලිමේන්තුව ද යළි කැඳවූ මොහොතක බොරිස් ජොන්සන් අග්‍රාමාත්‍යවරයාට විසුමක් නම් නොවනු ඇති බව දැන්ම පටන් ඉඳුරාම කිව හැකියි..
ප්‍රමෝද් චින්තක පීරිස්
