කොළඹ LNW:විශ්ව විද්‍යාල ආචාර්ය අමිති සම්මේලනය විසින් ගෙන ගිය වෘත්තීය සමිති ක්‍රියාමාර්ගය තාවකාලිකව අත්හිටුවමින් එළඹෙන 17 වැනිදා සිට විශ්ව විද්‍යාල අධ්‍යයන කටයුතු ආරම්භ කිරීමට පියවර ගෙන ඇති ආකාරයට උසස පෙළ පිළිතුරු පත්‍ර ඇගයීම කඩිනමින් ආරම්භ කිරීමට අවශ්‍ය සහය දෙන ලෙස අධ්‍යාපන අමාත්‍යාංශය නිවේදනයක් නිකුත් කරමින් ඉල්ලා සිටියි.
විශ්ව විද්‍යාල ආචාර්ය සංගමය සමඟ පසුගිය මාස 1,1/2 තුළ සාකච්ඡා වට කීපයක් පවත්වා එම සංගමය විසින් ඉදිරිපත් කරන ලද ගැටලු කීපයකට විසඳුම් ලබා දී ඇති බවයි අමාත්‍යාංශය සඳහන් කරන්නේ.
විශ්වවිද්‍යාල ආචාර්ය සංගමයට තවදුරටත් යම් ගැටලු සාකච්ඡා කිරීමට අවශ්‍ය නම් ඉදිරි ඕනෑම දිනක ඊට සූදානම් බව ද අධ්‍යාපන අමාත්‍යාංශය වැඩිදුරටත් දැනුම් දෙයි.
මේ අතර ඊයේ දින මාධ්‍ය වෙත ප්‍රකාශයක් ලබාදෙමින් ලංකා ගුරු සංගමයේ ලේකම් ජෝශප් ස්ටාලින් මහතා පැවසුවේ එම පිළිතුරු පත් ඇගයීමේ කටයුතු සඳහා තවත් ගුරුවරු 7000ක හිඟයක් පවතින බවයි.
එම පිළිතුරු පත්‍ර ඇගයීම සඳහා ගුරුවරයෙකුට ලැබෙන දෛනික දීමනාව සම්බන්ධ ගැටලුකාරී තත්ත්වය මත ගුරුවරු ඊට අයදුම් කිරීමෙන් වැළකී ඇති බවයි ස්ටාලින් මහතා සඳහන් කළේ.
ආශිකා බ්‍රාහ්මණ
