රෂිකා හෙන්නායක මැයි 04 ,ලෝකය (අවුට්බවුන්ඩ් ටුඩේ):
උතුරු කොරියානු කාන්තා පාපන්දු කණ්ඩායමක් වන නේගොහ්යෑං (Naegohyang FC) කණ්ඩායම, ආසියානු ශූරයන්ගේ ලීගයේ අවසන් පූර්ව තරගයකට සහභාගී වීම සඳහා දකුණු කොරියාවට පැමිණීමට නියමිතයි.
වසර 2018 න් පසු උතුරු කොරියානු ක්‍රීඩා කණ්ඩායමක් දකුණු කොරියාවට පැමිණෙන පළමු අවස්ථාව මෙය වන අතර, දෙරට අතර පවතින දේශපාලන නොසන්සුන්තාවය හමුවේ මෙය ඉතා දුර්ලභ ක්‍රීඩා හුවමාරුවක් ලෙස සැලකේ.
මෙහිදී උතුරු කොරියානු කණ්ඩායම දකුණු කොරියාවේ සුවොන් (Suwon FC) කණ්ඩායම සමඟ මැයි 20 වන දින තරග වැදීමට නියමිතය.
මෙම සංචාරය සඳහා ක්‍රීඩිකාවන් සහ නිලධාරීන් ඇතුළු 39 දෙනෙකුගෙන් යුත් දූත පිරිසක් සහභාගී වන බව දකුණු කොරියානු ඒකාබද්ධතා අමාත්‍යාංශය තහවුරු කර ඇත.
ආසියානු කාන්තා පාපන්දු ක්ෂේත්‍රයේ ප්‍රබල බලවේගයක් වන උතුරු කොරියාවේ මෙම පැමිණීම කලාපීය සහයෝගීතාවයේ සුවිශේෂී සන්ධිස්ථානයක් ලෙස හඳුනාගත හැකිය.
