01. ජාතික සීමා නිර්ණ කමිටුවේ අවසන් වාර්තාව මැයි මස තුන්වන සතියේ පමණ ලබා දෙන බව එහි සභාපති මහින්ද දේශප්‍රිය පවසයි: කමිටුවේ අතුරු වාර්තාවට අදාළව යෝජනා 400ක් පමණ ලැබුණු බව පවසයි: මෙම යෝජනා විශ්ලේෂණය සහ සමාලෝචනය කර තම නිරීක්ෂණ අදාළ පාර්ශවකරුවන් සමඟ බෙදා ගන්නා බව ද පවසයි.
02. නිදහස් වෙළඳ ගිවිසුමකට (FTA) මඟ පාදන යෝජිත මනාප වෙළඳ ගිවිසුම (PTA) සඳහා සාකච්ඡා ආරම්භ කිරීම සඳහා ශ්‍රී ලංකාව සහ බංග්ලාදේශය එළඹෙන මැයි 29 වන දින වීඩියෝ තාක්ෂණය හරහා හඳුන්වා දීමේ රැස්වීමක් පැවැත්වීමට නියමිත බව ජනාධිපති ලේකම් කාර්යාලයේ ස්ථාපිත ජාත්‍යන්තර වෙළඳ කාර්යාලයේ ශ්‍රී ලංකා ප්‍රධාන නිදහස් වෙළඳ ගිවිසුම් සාකච්ඡාකරු කේ.ජේ. වීරසිංහ පවසයි.
03. මෙරට විදෙස් සංචිත ප්‍රමාණය අප්‍රේල් අවසන් වන විට ඇ.ඩො. මිලියන 2,755 දක්වා ඉහළ ගොස් ඇති අතර, එය මාර්තු මාසයේදී පැවතියේ ඇ.ඩො. මිලියන 2,694 ක බව මහ බැංකු දත්ත පෙන්වා දෙයි: වසර දෙකකට පෙර චීන මහජන බැංකුව විසින් ලබා දුන් ඇ.ඩො. බිලියන 1.4 ක ස්වප් පහසුකමින් ලැබුණු මුදල් සංචිතය ද මෙහි ඇතුළත් ය.
04. අයහපත් කාලගුණ තත්ත්ව හේතුවෙන් පවුල් 6,000 කට අධික පිරිසක් පීඩාවට පත්ව ඇති බව ආපදා කලමනාකරණ මධ්‍යස්ථානය පවසයි: කලුතර, ගම්පහ, බදුල්ල, ත්‍රිකුණාමලය, රත්නපුර, කෑගල්ල, යාපනය, මුලතිව්, පුත්තලම සහ කුරුණෑගල යන දිස්ත්‍රික්කවල පවුල් 1,634 ක පුද්ගලයන් 6,345 පීඩාවට පත්ව ඇති බව සඳහන්: අධික සුලං සහ ගංවතුර තත්ත්ව මත නිවාස 87 කට අඩවශයෙන් අලාභහානි සිදුව ඇත.
05. තිරිඟු පිටි ආනයනය කිරීමේදී කිලෝග්‍රෑමයකට රු. 3 වශයෙන් පැනවූ රේගු බද්ද ඉවත් කරමින් ලබා දී තිබූ සහනය ඉවත් කිරීමට රජය කටයුතු කරන බව මුදල් රාජ්‍ය අමාත්‍ය රංජිත් සියඹලාපිටිය පවසයි: මෙමඟින් තිරිඟු පිටි මිල කලමනාකරණය සහ සියයට 90ක් වන යැපුම් මට්ටමේ සිටින වී ගොවීන් ආරක්ෂා කිරීම රජයේ අරමුණ වන බවත්, මින් තිරිඟු පිටි මිලට කිසිඳු බලපෑමක් එල්ල නොවන බවත් පවසයි.
06. 2022 වසරේදී පුනර්ජනනීය බලශක්තිය මෙගාවොට් 211ක් බලශක්ති මිශ්‍රණයට (Energy Mix) එක් කර ඇති අතර ඉන් මෙගාවොට් 146ක් සූර්ය පැනල බලශක්තිය බව විදුලිබල හා බලශක්ති අමාත්‍ය කංචන විජේසේකර පවසයි: 2027 – 2030 වන විට පුනර්ජනනීය බලශක්තියෙන් මෙගාවොට් 3075 ක ධාරිතාවක් එකතු කිරීම සහ මෙගාවොට් 1525 ක් ගබඩා කිරීම අපේක්ෂා කරන බව ද පවසයි.
07. මෙරට මාසික සංචාරක ඉපැයීම් 2023 දී මසකට ඇ.ඩො. මිලියන 160 ට වඩා ඉහළ මට්ටමක පවතී: අප්‍රේල් 2023 හි පළමු මාස හතර තුළ සමුච්චිත සංචාරක ආදායම ඇ.ඩො. මිලියන 696.3 දක්වා ගෙන එයි; එය 2022 එම කාලයට වඩා 17.8% කින් ඉහළ ය: මාර්තු වල සංචාරකයන් 125,495 මෙරටට පැමිණ ඇති අතර, අප්‍රේල් මාසයේදී 105,498 ක් පැමිණ ඇති අතර, සමුච්චිත පැමිණීම් 441,177 දක්වා ගෙන තිබේ.
08. පාසල් සිසුන් දෙදෙනෙකුගේ මළ සිරුරු කොක්කුවිල් වෙරළට ගසාගෙන පැමිණ තිබේ: මියගිය දරුවන් 16 හැවිරිදි සිසුන් බව හඳුනාගෙන ඇත: මෙම පිරිමි ළමුන් දෙදෙනා මුහුදේ දිය නෑමට ගොස් දියේ ගිලී මිය යන්නට ඇති බව මූලික විමර්ශනවලින් හෙළි වී ඇත: විමර්ශන දිගටම සිදුවෙමින් පවතියි.
09. රටේ සමස්ත ජනතාවගෙන් 88% ණය ගැනීම, ණය නොගෙවා සිටීම, හෝ භාණ්ඩ උකසට තැබීම සිදුකරමින් සිටන බව ජාතික ජනබලවේගයේ නායක පා.ම. අනුර කුමාර දිසානායක පවසයි: ජනතාවගෙන් 68% ම තමුන් ලබා ගන්නා ආහාර ප්‍රමාණය හෝ ආහාර වේල් ප්‍රමාණය සීමා කර ඇති අතර, තමා අකමැති රළු ආහාර බලෙන් ගැනීමට සිදුව ඇති තත්ත්වයකට පත්ව ඇති බව පවසයි: ජනගහනයෙන් 40% ක් දරුවන් සඳහා අධ්‍යාපනය සහ සෞඛ්‍ය සේවා සඳහා ඇති ප්‍රවේශය කප්පාදු කර ඇති බව ද අනාවරණය කරයි.
10. දේශීය හඳුන්කූරු වෙළඳපොලේ ප්‍රමුඛයකු මෙන්ම පුරෝගාමියකු වන අම්රිතා හඳුන්කූරු, ශ්‍රී ලංකා ප්‍රමිති සහතිකය ලබා ගනියි: අම්රිතා හඳුන්කූරු නිෂ්පාදනය කර බෙදා හරිනු ලබන්නේ සීමාසහිත Darley Butler & Company විසිනි.
