රටේ ආර්ථිකය පවතින්නේ ඉතාම අයහපත් තත්වය බැවින් මේ දේශපාලන අස්ථාවරභාවය සති ගණන් ඇදගෙන යා නොහැකි බව ශ්‍රී ලංකා නීතීඥ සංගමයේ සභාපති සාලිය පීරිස් මහතා අවධාරණය කරයි.
“පසුගියදා මුදල් අමාත්‍යවරයා කිව්වා අපේ සංචිතයේ පාවිච්චි කරන්න පුළුවන් ප්‍රමාණය තියෙන්නෙ ඩොලර් මිලියන 50යි කියලා. ඒ කියන්නෙ එක තෙල් නැවක් ගෙනාවාම ඒක ඉවරයි. ඉතින් මේ බරපතළ තත්වය තියෙද්දී තමයි මේ 09 වෙනිදා සිදුවීම වෙන්නේ. ඒ ප්‍රකෝපකාරී සිදුවීම ආරම්භ කරන්නේ මේ බරපතළ තත්වය මේ රටේ තියාගෙන. ඉතින් දේශපාලන අස්ථාවරභාවය සති ගණන් යන්න බැහැ. තව සති කිහිපයක් මේ අස්ථාවරකම පැවතුණොත් ඒකෙ තියෙන බරපතළකම අති විශාලයි. ඒ නිසා මේකෙ තියෙන අතිශයින් බැරෑරුම්කම තේරුම් ගන්න ඕනෙ අපි හැමෝම. අපි මොනවා කිව්වත් ඒ බැරෑරුම්කම තේරුම් ගන්නෙ නැතුව මේ ප්‍රශ්නෙට විසඳුම් හොයන්න බෑ. ඒ නිසා තමයි මේ රටේ දේශපාලනඥයින් විසඳුම් හොයන්න ඉක්මන් වෙන්න ඕනෙ. අවාසනාවකට අපි දැක්කා මේ රටේ අමාත්‍යවරුන් ඉල්ලා අස්වුණේ අප්‍රේල් 04 වෙනිදා. එතැන් සිට අපි දැන් මාසෙකටත් වැඩි කාලයක් තිස්සේ මේ ගැන තර්ක විතර්ක කර කර ඉන්නවා විසඳුමක් ගේනවා වෙනුවට. පාර්ලිමේන්තුවේ දිගින් දිගට අපි කතා කර කර ඉන්නවා, නමුත් ඇත්තටම විසඳුමකට එන්නෙ නෑ. ඉතින් ඒ ඇතිකරන විසඳුම භූමියේ, පොළවේ පිළිගන්න පුළුවන් විසඳුමකුත් වෙන්න ඕනෙ. විශේෂයෙන්ම 09 වෙනිදා සිද්ධිවලින් පස්සෙ මේ රටේ සාමාන්‍ය ජනතාව විශ්වාස කරන විසඳුමක් වෙන්න ඕනෙ. එවැනි විසඳුමක් නැත්නම් මම හිතන්නෑ දේශපාලන ස්ථාවරභාවයක් තියෙන්න පුළුවන් කියලා”
සාලිය පීරිස් මහතා මේ බව පැවසුවේ දෙරණ රූපවාහිනී නාලිකාවේ වැඩසටහනකට එක්වෙමිනි.
RN
