කොළඹ LNW:ආණ්ඩු පක්ෂයේ සිට සමඟි ජන සන්ධානයට එක් වූ කිසිවකුට හෝ නාම යෝජනා දෙන බවට මෙතෙක් කිසිදු තීරණයක් ගෙන නැති බව විපක්ෂයේ ප්‍රධාන සංවිධායක පාර්ලිමේන්තු මන්ත්‍රී ලක්ෂ්මන් කිරිඇල්ල මහතා පවසයි.
විශේෂයෙන් මහනුවර දිස්ත්‍රික්කයේ අපේක්ෂක ලැයිස්තුවට ඇතුල්කරන නම් 15 මේ වන විටත් සූදානම් අතර ආසන සංවිධායකවරු 13 හැරුණු කොට රවුෆ් හකීම් සහ වේලු කුමාර් අපේක්ෂක ලයිස්තුවේ සිටින බවයි කිරිඇල්ල මහතා සඳහන් කරන්නේ.
”ආණ්ඩු පක්ෂය වුණු පොහොට්ටුවේ සිට විපක්ෂයට එකතු වූ මන්ත්‍රීවරුන් අතර හොඳ අය වගේම අපේ සමඟියට බාධා කරන, කණ්ඩායම් හැඟීමෙන් තොරව කටයුතු කරන පිරිසක් සිටිනවා. ආණ්ඩු පක්ෂයේ මන්ත්‍රීවරුන් විපක්ෂයට එකතු වුණේ ඔවුන්ගේ කැමැත්තෙන් මිස අපේ ආරාධනාවකට අනුව නෙමෙයි. ඒ අයට නාම යෝජනා දීමේදී හැසිරීම, විනය, කණ්ඩායම් හැඟීම ආදී කරුණු රැසක් නායකත්වය විසින් සලකා බලනවා. මහනුවර දිස්ත්‍රික්කයේ සමඟි ජන බලවේගයේ අපේක්ෂක ලැයිස්තුව මේ වන විට සම්පූර්ණව තිබෙන නිසා සමඟි ජන සන්ධානයට අලුතින් එක් වූ කිසිවකුටත් මහනුවරින් නාම යෝජනා දීමේ හැකියාවක් නෑ” යනුවෙනුයි ඔහු පවසන්නේ.
කිරිඇල්ල මන්ත්‍රීවරයා මේ බව කියා තිබුණේ මහනුවර ප්‍රදේශයේ පැවති මාධ්‍ය හමුවකදීය.
ආශිකා බ්‍රාහ්මණ
