සටහන – රුවන් නෙළුගොල්ල
2016 වසරේ සිට රියදුරු පුහුණු උපදේශක විභාගය සහ 2022 වසරේ පැවැති රියදුරු පුහුණු උපදේශක සහකාර විභාගය සමත්ව ඇති අයට මේ මොහොත වන තුරු රියදුරු උපදේශක බලපත්‍ර ලබා දී නොමැති බවත් එම නිසා ඔවුන්ට රියදුරු පාසල් පවත්වා ගෙන යාමට නොහැකි වී ඇති බවත් විපක්ෂ නායක සජිත් ප්‍රේමදාස මහතා පවසයි.
මේ අය මේ සිදු කරන්නේ ස්වයං රැකියාවක්, ව්‍යාපාරයක් හා ව්‍යවසායකත්වයක් බවත් මෙය රජයට බරක් නොවන දෙයක් නිසා මේ සම්බන්ධයෙන් රජයේ අවධානය යොමුවිය යුතු බවත් විපක්ෂ නායකවරයා පෙන්වා දුන්නේය.
එමෙන් ම රියදුරු පාසල් සඳහා බස්රථ ලබා ගැනීමේ දී ආදායම් බලපත්‍ර ලබා ගැනීමේ දී පළාත් මඟින් නිශ්චිත ක්‍රමවේදයක් අනුගමනය නොකිරීම නිසා රියදුරු පාසල් හිමියන් අපහසුතාවට පත්ව ඇති බවත් එසේ ම රියදුරු පාසල් නියාමනයේ දී මෝටර් රථ පරීක්ෂකවරුන්ට ලබා දී ඇති අසීමිත බලය මෙම රියදුරු පාසල් හිමිකරුවන්ට හිරිහැරයක් වන සේ භාවිත කරන බවත් විපක්ෂ නායකවරයා පැවසීය.
තවද නීත්‍යානුකූල නොවන අන්දමින් පවත්වා ගෙන යන රියදුරු පාසල් ඇති බවට වාර්තා වන බවත් එවැනි දෙයක් සිදුවුවහොත් රජයට ලැබෙන ආදායම් අහිමි වන නිසා මේ ගැන සොයා බලන ලෙසත් විපක්ෂ නායක සජිත් ප්‍රේමදාස මහතා ඉල්ලා සිටියේය.
විපක්ෂ නායක සජිත් ප්‍රේමදාස මහතා මේ බව පැවසුවේ පෙරේදා (22) පාර්ලිමේන්තුව අමතමිනි.
