මෙරට සුවහසක් පෙම්වතුන්ගේ පරමාදර්ශී ස්ත්‍රී රූපය මනසේ සිත්තම් කළ නිළි මාලිනිය නික්ම ගොසිනි. සිනමාපට 150ක තරම් විවිධ පරාසයන්හි චරිතාංග භූමිකාවන් ඈ නිරූපණය කළා ය. ගාමිණී-මාලිනී, විජය – මාලනී ලෙසින් යුගල පද මෙරට භාෂිතයට එක් කළා ය.
බොහෝ සිනමාපටයන්හි ඇගේ හාවභාව ලීලා කිසිදිනෙක ඉතිහාස මතකයෙන් ඈත්ව නොයන පරිද්දෙන් ලියැව තිබෙනු ඇත.
වසන්ත ඔබේසේකර සමඟ ඇගේ පළමු සහ අවසාන රංගන එක්වීම “දියමන්ති” සිනමාපටයයි. මෙම සිනමාපටය රූගත කරන සමයේ ඈ විසි වයස් මැද්දේ භද්‍ර යෞවනියකි. “ත්‍රිලර්” ප්‍රවර්ගයට ගිණිය හැකි සිනමාපටයක් වන “දියමන්ති”හි ඇගේ භාව නිරූපණයන් විස්මයජනක ය.
සුනිල් ආරියරත්නගේ පද පෙළ, නන්දාගේ ගැයුමට යොවුන් වසන්තයේ මේ කෙළිලොල්, වගකීම් විරහිත යෞවන සිහිනය මෙතරම් කෙතරම් අගේට නිරූපණය වේද ?
මාලිනියේ, රෑන් මුදාගෙන පාවී යනු මැන ඉගිල්ලිලා…!
~ සඳුන් ප්‍රියංකර විතානගේ
