සටහන – රෂිකා හෙන්නායක
කොළඹ (LNW): කොළඹ විපක්ෂනායක කාර්යාලයේ මාධ්‍ය හමුවක් අමතමින්, විශේෂඥ වෛද්‍යවරුන් ඇතුළු සෞඛ්‍ය වෘත්තිකයන් විශාල පිරිසක් රට හැර යාමෙන් සෞඛ්‍ය පද්ධතිය බරපතළ අර්බුදයකට ලක්ව ඇතැයි පාර්ලිමේන්තු මන්ත්‍රී වෛද්‍ය කාවින්ද ජයවර්ධන මහතා පවසයි.
පසුගිය වසරේ පමණක් විශේෂඥ වෛද්‍යවරුන් හයසීයකට (600) ආසන ප්‍රමාණයක් සහ වසර දෙකක් තුල වෛද්‍යවරුන් දෙදහසකට (2000) ආසන්න ප්‍රමාණයක් රට හැර ගොස් ඇතැයි ද මන්ත්‍රීවරයා පවසන අතර සෞඛ්‍ය කාර්යය මණ්ඩලයට අමතරව රෝහල්වල අත්‍යවශ්‍ය ඖෂධ හා උපකරණ බරපතළ හිගයක් පවතින බවද ඔහු කියා සිටියේය.
මේ දිනවල පැතිර යන ඩෙංගු කොරෝනා ඉන්ෆ්ලුවෙන්සා ඇතුළු වෛරස් රෝග ව්‍යාප්ත වෙද්දී රෝහල්වල රෝගීන්ට ලබාදෙමින් ඇත්තේ පෙරසිටමෝල් හා විටමින් සී පමණක් බවද වෛද්‍ය කාවින්ද ජයවර්ධන මහතා පවසයි.
මේ ආකාරයට තවත් මාස හයක් පමණ සෞඛ්‍ය පද්ධතිය ක්‍රියාත්මක වුවහොත් සෞඛ්‍ය ආපදාවක් අනිවාර්යෙන්ම රට තුළ ඇති වන බවත් මෙය ඉතාමත් කණගාටුදායක තත්ත්වයක් බවත් පාර්ලිමේන්තු මන්ත්‍රී වෛද්‍ය කාවින්ද ජයවර්ධන මහතා තවදුරටත් පැවසීය.
රටපුරා සියලු තොරතුරු දැනගන්න එක්වන්න අපගේ Whatsapp Newsroom වෙත??
