සමගි ජන බලවේගය ස්ථිරවම බලය අල්ලනු ඇතැයි අපේක්ෂාවෙන් සිටි කොළඹ මහ නගර සභාව සහ කොලොන්නාව නගර සභාව යන පළාත් පාලන ආයතන දෙකේම බලය පිහිටුවීමට ජාතික ජන බලවේගය සමත් විය. ඒ සජබ නාගරික මන්ත්‍රීවරුන්ගේම දුර්වල ක්‍රියාකලාපය හේතුවෙනි. විශේෂයෙන් කොලොන්නාවේ නගරාධිපති ධුරය ජාජබට හිමිවූයේ සජබ මන්ත්‍රීවරයකුගේ ද සහාය ඇතිව ය.
මෙම තත්වයට ප්‍රධානතම හේතුව වී ඇත්තේ සජබ පාර්ලිමේන්තු මන්ත්‍රීවරුන් වන එස්. එම්. මරික්කාර් සහ මුජිබර් රහුමාන් අතර ගැටුමක් බව දේශපාලන ආරංචිමාර්ග පවසයි.
මේ දෙදෙනාම කොළඹ දිස්ත්‍රික්කය නියෝජනය කරන පාර්ලිමේන්තු මන්ත්‍රීවරුන් වන අතර කොළඹ මුස්ලිම් ඡන්ද පදනම සම්බන්ධයෙන් තරගයක නියැළී සිටින දෙදෙනෙකි. කොළඹ මහ නගර සභාවේ බලය පිහිටුවීමේ මෙහෙයුම මුජිබර් යටතේ සිදුකෙරුණු අතර කොල්ලොන්නාවේ මෙහෙයුම සිදුකෙරුණේ මරික්කාර්ගේ ප්‍රධානත්වයෙනි. කොළඹ මෙහෙයුමට තමන්ව සම්බන්ධ කර නොගැනීම පිළිබඳව මරික්කාර් මන්ත්‍රීවරයා විවෘතවම මාධ්‍ය ඉදිරියේ සිය අප්‍රසාදය පළකරන ආකාරය ද පසුගිය දිනවල දැකගත හැකිවිය.
මේ මෙහෙයුම් දෙකේදීම තම තමන්ගේ පෞද්ගලික දේශපාලන න්‍යායපත්‍ර පෙරටු කරගෙන මුජිබර් රහුමාන් සහ එස්. එම්. මරික්කාර් එකිනෙකාට එදිරිව කටයුතු කිරීම හේතුවෙන් සජබට අතේ තිබුණු ජයග්‍රහණ දෙකක් අහිමි වූ බවට පක්ෂ අභ්‍යන්තරයෙන්ම විවේචනයක් එල්ල වී ඇති බවයි ආරංචිමාර්ග වැඩිදුරටත් සඳහන් කළේ.
