කොළඹ LNW:කිසියම් හෝ ගුරුවරයෙක් රනිල් වික්‍රමසිංහට කතිරය ගහන්න ඕනේ කියල හිතනවා නම් ඒ ගුරුවරයාට කඳුළු ගෑස් සුවද විලවුන් ලෙසත් බැටන් පොලු ප්‍රහාරය මසාජ් එකක් ලෙසත් දැනිය යුතු බව ජාතික ජන බලවේගයේ නායක පාර්ලිමේන්තු මන්ත්‍රී අනුර දිසානායක මහතා පැවසුවේය.
දිසානායක මහතා මේ බව සඳහන් කළේ ඊයේ (27) පැවති මඩකලපුව දිස්ත්‍රික් ගුරු සමුළුව අමතමිනි.
රනිල් වික්‍රමසිංහ කඳුළු ගෑස් බැටන් පොලු අරන් ආවද ගුරුවරු වන ඔබ යන්නේ ජන්ද කාඩ් පත සහ හැඳුනුම් පත රැගෙන වන බවත් ලක්ෂ දෙකකට වැඩි ගුරු පරපුර සහතික වශයෙන්ම රනිල් වික්‍රමසිංහ පරාජය කිරීම සඳහා ඉදිරියට පැමිණෙන බවට විශ්වාසයක් ඇති බවත් අනුර දිසානායක මහතා කියාසිටියේය.
”වැටුප් වැඩි වීම ගැන දීර්ඝ උද්ඝෝෂණයක් තිබුණා. ඒ උද්ඝෝෂණය නතර කිරීම සඳහා ආණ්ඩුව සහ වෘත්තීය සමිති අතර එකඟතාවකට ආවා. අයවැය යෝජනාවට එය ඇතුල් කළා. අයවැයට ඇතුල් කරපු යෝජනාවෙන් පියවර කිහිපයකට වැටුප් වැඩිකරන්න එකඟ වුණා. ඒ එකඟතාව ඉටුකරන්න කියලයි ගුරුවරු ඉල්ලන්නේ. හැබැයි ආණ්ඩුව ඒකට උනන්දුවක් දක්වන්නේ නැහැ. හැබැයි රනිල් වික්‍රමසිංහට කෝටි 875ක් වෙන් කරනවා. අයවැය ලේඛනයෙන් වෙන් කරන්නේ නැතුව. පරිපූරක ඇස්තමේන්තුවක් ගෙනල්ලා. ඒ කියන්නේ හදිසි යෝජනාවක් ගෙනල්ලා රනිල් තමන්ට මුදල් වෙනක්රගන්නේ. හැබැයි ගුරුවරුන්ට අයවැය යෝජනාවට දාපු යෝජනාව ක්‍රියාත්මක වෙන්නේ නැහැ. රනිල් වික්‍රමසිංහට රට යන්න අයවැයෙන් සල්ලි වෙන් කළා. මොකද වුණේ අවුරුද්දටම වෙන්කරපු සල්ලි මාස හතරෙන් ඉවර කළා. හැබැයි අලුතෙන් කෝටි 20ක් වෙන්කළා. අයවැය ලේඛනයේ නැතුව. නමුත් ගුරුවරුන්ට අයවැය ලේඛනයෙන් සම්මත වුණ යෝජනාව ඉටුකරන්නේ නැහැ. රනිල්ලා අයවැයේ නැති සල්ලිත් වෙන්කර ගන්නවා. මොකද හැන්ද තියෙන්නේ එයාලා ගාව. එයාලා මොකද කරන්නේ ඒ හැන්දෙන් එයාලා බෙදා ගන්නවා.” යනුවෙන් ඔහු වැඩිදුරටත් ප්‍රකාශ කළේය.
ආශිකා බ්‍රාහ්මණ
