ජනාධිපති අනුර කුමාර දිසානායක මහතා විසින් ශ්‍රී ලංකා නාවික හමුදාවේ මාණ්ඩලික ප්‍රධානී ලෙස කටයුතු කළ රියර් අද්මිරාල් ඩේමියන් ප්‍රනාන්දු වයිස් අද්මිරාල් නිලයට උසස් කරමින් ශ්‍රී ලංකා නාවික හමුදාවේ 27 වන නාවික හමුදාපති ලෙස පත් කරනු ලැබ තිබේ.
ඊට අදාළ පත්වීම් ලිපිය ජනාධිපති ලේකම් ආචාර්ය නන්දික සනත් කුමානායක මහතා විසින් ජනාධිපති ලේකම් කාර්යාලයේදී අද (30) පස්වරුවේ ඒ මහතා වෙත භාරදෙන ලදී.
ජූලි 01 වන දා සිට බල පැවැත්වෙන පරිදි මෙම පත් කිරීම සිදු කර ඇති අතර වත්මන් නාවික හමුදාපති අද්මිරාල් කාංචන බානගොඩ මහතා ජූලි 01 වන දා ධුරයෙන් විශ්‍රාම යෑමට නියමිතය.
වෙන්නප්පුව ශාන්ත ජෝශප් වාස් විද්‍යාලයෙන් අධ්‍යාපනය හැදැරූ ඩේමියන් ප්‍රනාන්දු මහතා 1991 වසරේදී ශ්‍රී ලංකා නාවික හමුදාවේ 21 වන බඳවා ගැනීම යටතේ විධායක අංශයේ ශිෂ්‍යභට නිලධාරියෙකු ලෙස නාවික හමුදාවට එක්වූ අතර, ත්‍රිකුණාමලය නාවික හා සාගරික විද්‍යා පීඨයේ මූලික නාවික පුහුණුව සාර්ථකව නිම කිරීමෙන් අනතුරුව 1993 වසරේදී උප ලුතිනන්වරයෙකු ලෙස අධිකාරියට පත්විය.
වසර 35ක විශිෂ්ට නාවික සේවා දිවිය තුළ දෙස් විදෙස් විවිධ වෘත්තීය හා විශේෂඥ පුහුණු පාඨමාලා රැසක් හදාරා ඇති වයිස් අද්මිරාල් ඩේමියන් ප්‍රනාන්දු මහතා රණශූර, උත්තම සේවා යන පදක්කම්වලින් මෙන්ම සිය වෘත්තීමය දක්ෂතාව, කාර්යක්ෂමතාව සහ කැපීපෙනෙන සේවා දායකත්වය අගයමින්, විවිධ අවස්ථා හයකදී ශ්‍රී ලංකා නාවික හමුදාවේ නාවික හමුදාපතිවරු විසින් ප්‍රශංසාත්මක ලිපි (Letters of Commendation) පිරිනමා සේවය ඇගයීමට ලක් කර තිබේ.
ඩේමියන් ප්‍රනාන්දු මහතා ජෙනරාල් ශ්‍රීමත් කොතලාවල ආරක්ෂක විශ්වවිද්‍යාලයෙන් ආරක්ෂක අධ්‍යයනය පිළිබඳ (Master of Defence Studies) විද්‍යාපති උපාධියත්, ලන්ඩනයේ කිංග්ස් විශ්වවිද්‍යාලයෙන් ජාත්‍යන්තර ආරක්ෂාව හා උපායමාර්ගික අධ්‍යයනය පිළිබඳ ශාස්ත්‍රපති (Master of Arts in International Security and Strategy) උපාධියත් හිමි කරගෙන ඇත.
