සටහන – පුලී
ජූලි 01, කොළඹ (LNW):බොලිවුඩයේ කින්ග් ඛාන් 2025 අගෝස්තු 2 වන දින පැවැත්වෙන City of Dreams Sri Lanka හි මහා විවෘත කිරීමේ උත්සවයට සහභාගී වීමට ඉඩ ඇති බව වාර්තා වී තිබේ.
මේ පිළිබඳ නිල තහවුරු කිරීමක් නිකුත් කර නොමැති අතර, සංවිධායකයින්ට සමීප ආරංචි මාර්ග පවසන පරිදි ජෝන් කීල්ස් හෝල්ඩින්ග්ස් පීඑල්සී (JKH) විසින් මෙල්කෝ රිසෝර්ට්ස් සහ එන්ටර්ටේන්මන්ට් (MRE) සමඟ හවුල්කාරිත්වයෙන් සංවර්ධනය කරන ලද City of Dreams Sri Lanka හි විවෘත කිරීමේ උත්සවයට ෂාරුක් ඛාන් ගේ පැමිණීමට ඉඩක් ඇති බව පැවසේ.
මීට අමතරව City of Dreams Sri Lanka සහ Cinnamon Life හි නිල සමාජ මාධ්‍ය පිටු දැනටමත් “විශේෂ කෙනෙකුගේ” පැමිණීම පිළිබඳව ඉඟි කරමින් සිටින අතර, ප්‍රවර්ධන රූපයේ ඇති රූපය ෂාරුක් ගේ අනන්‍යතාවය සනිටුහන් කරන ඉරියව්වට සමීප වේ.
ඇමරිකානු ඩොලර් බිලියන 1.2 ක ආයෝජනයක් සහිත City of Dreams සංවර්ධනයට ලෝක මට්ටමේ කැසිනෝ ශාලාවක්, අති සුඛෝපභෝගී හෝටලයක් සහ ඉහළ මට්ටමේ සාප්පු සංකීර්ණයක් ඇතුළත් වන අතර එය ශ්‍රී ලංකාවේ මේ දක්වා සිදු කර ඇති විශාලතම පෞද්ගලික අංශයේ ආයෝජනය බවට පත් වනු ඇත.
මෙම දියත් කිරීම කොළඹ ගෝලීය සංචාරක සහ විනෝදාස්වාද ගමනාන්තයක් ලෙස ස්ථානගත කිරීමේ සන්ධිස්ථානයක් වනු ඇතැයි අපේක්ෂා කෙරේ.
