කොළඹ LNW:ආර්ථික අර්බුදයෙන් එළියට ගැනීම පමණක් නෙවෙයි රටේ ආර්ථිකයට සාධනීය විසඳුමක් දිය හැකි අපේක්ෂකයා ජනාධිපතිවරණයට ඉදිරිපත් කරන බව ශ්‍රී ලංකා පොදුජන පෙරමුණේ ජාතික සංවිධායක පාර්ලිමේන්තු මන්ත්‍රී නාමල් රාජපක්ෂ මහතා අවධාරණය කළේය.
මන්ත්‍රීවරයා මේ බව සඳහන් කළේ අද (04) ශ්‍රී ලංකා පොදුජන පෙරමුණේ පක්ෂ මූලස්ථානයේ බැසිල් රාජපක්ෂ මහතාගේ ප්‍රධානත්වයෙන් පැවති වැඩසටහනකින් අනතුරුව මාධ්‍ය වෙත අදහස් දක්වමිනි.
”අපේක්ෂකයා ඉදිරිපත් කරන්නේ වෙලාවට. අපි පිච් එක හදාගෙන යනවා. ඒ නිසා අපි සූදානම්. මැතිවරණ කොමිසම දින නියම කරයි. වෙලාවට කලාවට මේ රට ජයග්‍රහණය කරවන්න පුළුවන්,ආර්ථික අර්බුදයෙන් එළියට එනවා විතරක් නෙවෙයි මේ රටේ ආර්ථිකයට සාධනීය විසඳුමක් ලබාදෙන්න පුළුවන් වගේම මේ රටේ තරුණයාගේ සිතුම් පැතුම්වලට උත්තර දෙන්න පුළුවන් අපේක්ෂකයෙක් අපි ගේනවා.”
මේ අතර පොහොට්ටුවේ අපේක්ෂකයා රනිල් වික්‍රමසිංහ මහතා නොවන බවට වගකීමෙන් පැවසිය හැකිද යන්න මාධ්‍යවේදියෙකු කළ ප්‍රශ්න කිරීමට පිළිතුරු දෙමින් නාමල් රාජපක්ෂ මහතා පැවසුවේ රට ගොඩගත හැකි ආර්ථිකය ගොඩගත හැකි අපේක්ෂකයා ඉදිරිපත් කරන බවට වගකීමෙන් පවසන බවයි.
ආශිකා බ්‍රාහ්මණ
