සටහන : සශිකලා මධුෂාණි
ජුලි 05, ලෝකය(අවුට්බවුන්ඩ් ටුඩේ) : දින හයකට පෙර ගැම්බියා-සෙනෙගාල් දේශසීමාවෙන් යුරෝපය බලා පිටත්ව ගිය සංක්‍රමණික යාත්‍රාවක් මොරිටේනියාවේ වෙරළට ඔබ්බෙන් පෙරලීමෙන් අවම වශයෙන් සංක්‍රමණිකයන් 89 දෙනෙකු මිය ගොස් ඇති බව එරට රජයේ ප්‍රවෘත්ති ඒජන්සිය වාර්තා කර තිබේ.
රටේ නිරිතදිග නගරයක් වන Ndiago සිට කිලෝමීටර් 4 ක් (සැතපුම් 2.5 ක්) පමණ අත්ලාන්තික් සාගරයේ වෙරළට ඔබ්බෙන් බෝට්ටුව පෙරළී ගොස් තිබිණ.
යාත්‍රාවේ අවම වශයෙන් සංක්‍රමණිකයන් 170දෙනෙක් සිට ඇති බව දිවි ගලවාගත් පිරිස සඳහන් කර ඇති අතර 5 හැවිරිදි දැරියක් ඇතුළු පුද්ගලයින් 9 දෙනෙකු බේරාගෙන තිබේ.
සංක්‍රමණ සඳහා වූ ජාත්‍යන්තර සංවිධානයේ (IOM) 2024 වාර්තාවකට අනුව, යුරෝපයට යන ගමනේ දිග නිසා අත්ලාන්තික් සාගරය හරහා ගමන් කිරීම ඇදහිය නොහැකි තරම් භයානක ලෙස සැලකෙන අතර බටහිර අප්‍රිකානු සංක්‍රමණිකයන් දහස් ගණනක් සෑම වසරකම රැකියා අවස්ථා සොයා යුරෝපයට ළඟා වීමට අත්ලාන්තික් සාගරයේ සහ අනතුරුදායක මධ්‍යධරණී මුහුද තරණය කරති.
