රටේ පොලිස්පති ධුරය මේ වනවිට දින 13ක් තිස්සේ හිස්ව පවතී. ඒ, හිටපු පොලිස්පති සී.ඩී. වික්‍රමරත්න මහතාට ලබාදී තිබුණු සේවා දිගුව පසුගිය ජුනි 26 වනදායින් අවසන් වීමත් සමග ය.
මේ තත්වය තුළ පොලිස්පතිවරයකු පත්කිරීම සම්බන්ධයෙන් ජනාධිපති රනිල් වික්‍රමසිංහ මහතා සහ මහජන ආරක්ෂක අමාත්‍ය ටිරාන් අලස් මහතා අතර සාකච්ඡාවක් පසුගිය බ්‍රහස්පතින්දා දිනයේදී පැවැත්වී ඇති බව වාර්තා වේ.
වැඩබලන පොලිස්පතිවරයකු පත්කරන්නේද යන්න හෝ සී.ඩී. වික්‍රමරත්න මහතාටම තවත් සේවා දිගුවක් ලබාදෙන්නේද යන්න පිළිබඳව තීන්දු කරන ලෙස ජනාධිපතිවරයා විසින් අමාත්‍ය ටිරාන් අලස් මහතාට දැනුම් දී ඇති බවයි ජනාධිපති කාර්යාලයේ ජ්‍යේෂ්ඨ නිලධාරියකු “ද ලීඩර්” වෙඩ් අඩවිය කළ විමසීමකදී ප්‍රකාශ කර ඇත්තේ.
ඒ අනුව හෙට (09) පස්වරුවේ මේ සම්බන්ධයෙන් ජනාධිපතිවරයා සහ ටිරාන් අලස් අමාත්‍යවරයා අතර තවත් විශේෂ සාකච්ඡාවක් පැවැත්වෙනු ඇති බවත් එහිදී පොලිස්පති ධුරය පිළිබඳ අවසන් එකඟතාවකට පැමිණීමට බොහෝදුරට ඉඩ ඇති බවත් එම නිලධාරියා වැඩිදුරටත් පවසා තිබේ.
RN
