කොළඹ LNW:රේගු පරීක්ෂාවකින් තොරව බහාලුම් 323 ක් නිසි පරීක්ෂාවකින් තොරව නිදහස් කිරීමේ සිදුවීම සම්බන්ධයෙන් ලැබී ඇති පැමිණිල්ලකට අදාළව ප්‍රකාශයක් ලබා දීම සඳහා අපරාධ පරීක්ෂණ දෙපාර්තමේන්තුව අද (09) හිටපු අමාත්‍යවරයෙකු වූ විමල් වීරවංශ මහතාට පැමිණෙන ලෙසට දන්වා තිබේ.
එම බහාලුම් සිද්ධිය සම්බන්ධයෙන් ප්‍රකාශයක් කරමින් වීරවංශ මහතා පවසා තිබුණේ එම බහාලුම් අයත් වන්නේ එක්තරා පළාතක ආණ්ඩුකාරවරයෙකුට බවයි. ඒ අනුව එම ප්‍රකාශය සම්බන්ධයෙන් අපරාධ පරීක්ෂණ දෙපාර්තමේන්තුව විසින් වීරවංශ මහතාගෙන් කරුණු විමසීමට නියමිත බව සඳහන්.
‘දූෂණය නාස්තිය ගැන කතා කරමින් ආපු මේ කයි පාලනය පහුගිය දවස්වල කන්ටේනර් තුන්සිය ගාණක් ඒ කියන්නේ රතු ලැයිස්තුවේ තියෙන කන්ටේනර් පවා කිසිම පරීක්ෂාවක් නැතිව නිදහස් කරලා තියෙනවා. ආරංචි විදියට එක්තරා පළාතක ආණ්ඩුකාරවයෙකුට අයිති කන්ටේනර්. මේ තුන්සිය විසි ගණන ඇතුළේ මොනවාද තිබුණේ. මොනවාද රට ඇතුළට ආවේ. මත්ද්‍රව්‍යද? රත්තරන්ද? මේක බරපතල ප්‍රශ්නයක්. මහබැංකු වංචාව වගේ ප්‍රශ්නයක්. කන්ටේනර් ඇතුලේ තිබුණේ මොනවාද කියලා අද දෙයියෝවත් දන්නේ නැහැ”
විමල් වීරවංශ මහතා පසුගිය ජනවාරි 29 වැනිදා මාධ්‍ය හමුවකදී එම අදහස් දැක්වීම සිදුකර තිබුණු අතර සමාජ මාධ්‍ය හරහා තමන්ට එල්ල වූ චෝදනාත්මක පළකිරීම් සම්බන්ධයෙන් ජනවාරි 30 වැනිදා බස්නාහිර පළාත් ආණ්ඩුකාරවරයා අපරාධ පරීක්ෂණ දෙපාර්තමේන්තුවට පැමිණිලි කර තිබුණි.
මීට අමතරව තවත් පාර්ශ්ව කිහිපයක්ම බහාලුම් සිද්ධිය සම්බන්ධයෙන් පැමිණිලි කර ඇත.
ආශිකා බ්‍රාහ්මණ
