අද (15) රාත්‍රියේදී පැමිණීමට නියමිත ඩීසල් නෞකාව පැමිණියහොත් හෙට හෝ අනිද්දා සිපෙට්කෝ ඉන්ධන පිරවුම්හල් වෙත හැරීම සිදුකළ හැකි අතර මේ වන විට නිකුත් කර තිබෙන කූපන්වලට ඉන්ධන ලබාදීමේදී ප්‍රශ්න සහගත තත්ත්වයක් උදා වනු බව ඉන්ධන පිරවුම්හල් හිමියන්ගේ සංගමයේ සභාපති කුමා රාජපක්ෂ මහතා පැවසුවේය.
එම කූපන් නිකුත් කරනු ලැබුවේ යුද හමුදාව විසින් බවත් එහෙත් මේ වන විට ඉන්ධන පිරවුම්හල් වල රාජකාරීවලින් ඉවත් කර තිබෙන හෙයින් එම කූපන් වල වගකීමක් ඉන්ධන පිරවුම්හල් වෙත නොහැකි බවයි රාජපක්ෂ මහතා පෙන්වා දුන්නේ.
එහෙයින් ගැටලුවකින් තොරව ඉන්ධන බෙදා දීම සඳහා යුද හමුදාව පැමිණ අවශ්‍ය ආරක්ෂාව ලබාදෙනු ඇති බව විශ්වාස කරන බව ඔහු සඳහන් කළේය.
එසේ නොවුණහොත් ඉන්ධන පිරවුම් හල් තුළ විශාල විනාශයක් සිදුවනු ඇති බවද ඔහු පැවසුවේය.
මේ අතර අමාත්‍යාංශය යෝජනා කර තිබෙන ඇප් හරහා ඉන්ධන ලබා දීම මේ මොහොතේ ප්‍රයෝගික නොවන බවද ඔහු කියා සිටියේය.
දින 20ක් පමණ ඉන්ධන නොමැතිව ජනතාව කල් ගත කර තිබෙන හෙයින් කළ යුත්තේ හැකි ඉක්මණින් ජනතාව වෙත අවශ්‍ය ඉන්ධන ලබාදීම බව ද හෙතෙම ප්‍රකාශ කරන ලදී.
ASK
