ගෝඨාභය රාජපක්ෂ මහතා ඉල්ලා අස්වීමෙන් පුරප්පාඩු වූ ජනාධිපති ධුරයට සුදුසු පුද්ගලයෙකු තෝරා පත්කර ගැනීමේ ඡන්ද විමසීම අනිද්දා පැවැත්වේ. නාමයෝජනා ඉදිරිපත් කිරීම හෙට උදෑසන පැවැත්වීමට නියමිතය.
ජනාධිපතිවරයා තෝරා පත්කර ගැනීමේදී සහාය ලබාදෙන්නේ කාටද යන්න සම්බන්ධයෙන් දේශපාලන පක්ෂ මෙන්ම මැති ඇමති කණ්ඩායම් අතර සාකච්ඡා තවදුරටත් පැවැත්වේ.
පාර්ලිමේන්තුවේ විශාලතම කණ්ඩායම වන ශ්‍රී ලංකා පොදුජන පෙරමුණේ මන්ත්‍රී කණ්ඩායමේ සාකච්ඡාවක් අද පැවැත්විණි. සාකච්ඡාව අවසානයේදී මන්ත්‍රීවරුන් ප්‍රකාශ කළේ නාමයෝජනා ලබාදීමෙන් පසු සහාය දෙන අපේක්ෂකයා තීරණය කරන බවයි.
මේ අතර ආණ්ඩුවේ සිට ස්වාධීන වූ පක්ෂ 09 කණ්ඩායම අද විපක්ෂ නායක සජිත් ප්‍රේමදාස මහතා හමු විය. මේ සඳහා විමල් වීරවංශ, උදය ගම්මන්පිල, වාසුදේව නානායක්කාර, ප්‍රේම්නාත් සී. දොලවත්ත ඇතුළු මන්ත්‍රීවරුන් පිරිසක් සහභාගි වී තිබෙනවා. එහිදී විපක්ෂ නායක සජිත් ප්‍රේමදාස මහතා මන්ත්‍රීවරුන්ගෙන් ඉල්ලා තිබෙන්නේ සර්ව පාක්ෂික ආණ්ඩුවක් බිහිකිරීම සඳහා තමාට සහයෝගය ලබාදෙන ලෙසයි.
කෙසේ නමුත් ස්වාධීන පක්ෂ එකමුතුව තවමත් නිශ්චිත තීරණයකට එළඹ නොමැත. ඔවුන් පවසන්නේ හෙට දිනයේදී සහාය දෙන අපේක්ෂකයා පිළිබඳව අවසන් තීරණයක් ගන්නා බවයි. එම පක්ෂ එකමුතුව කරුණු කිහිපයක් ඇතුළත් ප්‍රකාශනයක් සකස් කර ඇති අතර එම ප්‍රකාශනයට එකඟ වන අපේක්ෂකයාට සහයෝගය ලබාදෙන බව ඔවුන් පවසනවා.
UN
