අද (ජුලි 20) දිනයේ සිට සිට සුදු බිත්තරයක විකුණුම් මිල රුපියල් 41ක් දක්වාත්, රතු බිත්තරයක මිල රුපියල් 42ක් දක්වාත් ඉහළ දැමීමට තීරණය කර ඇති බව සමස්ත ලංකා බිත්තර නිෂ්පාදකයින්ගේ සංගමය පවසයි.
බඩ ඉරිඟු ආනයනය සම්පූර්ණයෙන්ම නවතා දමා ඇති අතර දේශීය බඩ ඉරිඟු නිෂ්පාදනය කුකුළු ගොවිපොලවල අවශ්‍යතාව සඳහා ප්‍රමාණවත් නොවන බව පැවසූ සමස්ත ලංකා බිත්තර නිෂ්පාදකයින්ගේ සංගමයේ සභාපති සරත් රත්නායක මහතා බිත්තර මිල ඉහළ යාම සම්බන්ධයෙන් රජය සහ අදාළ බලධාරීන් සෘජුව වගකිව යුතු බවත් අවධාරණය කළේය.
ඉරිඟු වෙනුවට සහල් ඇතුළු විවිධ ආදේශක භාවිත කිරීම හේතුවෙන් සතුන්ගේ සෞඛ්‍යයට හා ආහාර ජීර්ණ පද්ධතියට බලපෑම් එල්ල වී ඇති බවත්, ඒ හේතුවෙන් බිත්තර නිෂ්පාදනය 20% – 30% අතර ප්‍රමාණයකින් පහත වැටී ඇති බවත් පැවසූ සරත් රත්නායක මහතා ඇතැම් කූඨ වෙළෙඳුන් සත්ත්ව ආහාරවලට විවිධ රසායනික ද්‍රව්‍ය සහ ඖෂධ මිශ්‍ර කිරීම හේතුවෙන් සතුන් විශාල ප්‍රමාණයක් මියගොස් ඇති බවත් පැවසීය.
ඉහත තත්වයන් තුළ දෙනික බිත්තර නිෂ්පාදනය සැලකිය යුතු මට්ටමකින් පහත වැටී, ගොවීන්ටත් දැඩි ලෙස පාඩුවී ඇති බවත් පැවසූ ඒ මහතා රජයේ සහ සත්ව නිෂ්පාදන දෙපාර්තමේන්තුවේ බලධාරීන් මේ ගැන දැනුවත්ව සිටියත් කිසිදු පිළිතුරක් ලබාදෙන ආකාරයක් පෙනෙන්නට නැති බවත් සඳහන් කළේය.
සමස්ත ලංකා බිත්තර නිෂ්පාදකයින්ගේ සංගමයේ සභාපති සරත් රත්නායක මහතා මේ බව පැවසුවේ ඊයේ (19) කුලියාපිටියේදී පැවති මාධ්‍ය හමුවක් අමතමිනි.
