සටහන – රුවන් නෙළුගොල්ල
වතු යටිතල පහසුකම් හා ජල සම්පාදන අමාත්ය ජීවන් තොණ්ඩමන් ඇතුළු සැකකරුවන් පිරිසක් අත් අඩංගුවට ගෙන අධිකරණයට ඉදිරිපත් කරන ලෙස නුවරඑළිය වැඩබලන මහෙස්ත්රාත් ජයමිණී අඹගහවත්ත මහතා විසින් නුවරඑළිය පොලීසියට නියෝග කර තිබේ.
ඒ, පසුගිය මැයි 30 වනදා අමාත්ය ජීවන් තොණ්ඩමන් ලංකා කම්කරු කොන්ග්රසයේ ආධාරකරුවන් පිරිසක් කැලණි වැලි සමාගම යටතේ පාලනය වන නුවරඑළියේ තේ කර්මාන්ත ශාලාවකට බලහත්කාරයෙන් ඇතුළු වීමේ සිද්ධිය සම්බන්ධයෙන් නුවරඑළිය පොලීසිය විසින් අධිකරණය හමුවේ කරුණු දැක්වූ අවස්ථාවේදී ය.
අද දිනයේ අධිකරණය හමුවේ පෙනී සිටින ලෙස ජීවන් තොණ්ඩමන් අමාත්යවරයා ඇතුළු සැකකරුවන්ට නුවරඑළිය පොලීසිය මගින් ලිඛිතව දැනුම් දී තිබුණු නමුත් ඔවුන් කිසිවකු අධිකරණය හමුවේ පෙනී නොසිටි නිසා වතු සමාගම වෙනුවෙන් පෙනී සිටි නීතීඥවරුන් අධිකරණය හමුවේ කරුණු ඉදිරිපත් කර තිබිණි.
