ජාත්‍යන්තර මට්ටමේ සටන් කලාව නැවත වතාවක් ශ්‍රී ලංකාව ට ගෙන එමින් කර්මා ෆයිට් ලීග් – Karma Fight League (KFL) – තරගාවලිය ජූලි 27 වැනිදා කොළඹදී පැවැත්වෙනවා.
මෙවර තරගාවලිය සඳහා ඉන්දියානු සටන් ශිල්පීන් හය දෙනෙක් සහභාගි වන බවට වාර්තා වනවා. එදා මෙදා තුර සටන් බිමක සිටින වැඩිම විදේශීය සටන් ක්‍රීඩක සංඛ්‍යාවක් දිවයිනට පැමිණෙන ප්‍රථම අවස්ථාවයි මේ. පසුගිය වසරේ පැවති තරගාවලියට සහභාගි වූයේ එක් ඉන්දියානු තරගකරුවෙක් පමණයි.
මෙවර තරගාවලිය සඳහා ඉන්දියානු සටන් ශිල්පීන් හය දෙනෙක් සහභාගි වන බවට වාර්තා වනවා.
තාරුණ්‍යයේ ජනප්‍රිය මිශ්‍ර සටන් කලාව වන KFL උන්මාදය දැන් දකුණු ආසියාව පුරා පැතිර යමින් තිබෙනවා.
KFL යනු ශ්‍රී ලංකා සටන් ක්‍රීඩා ඉතිහාසයේ ෙඑතිහාසික හැරවුමක්. තරුණ නිර්මාණශීලී කණ්ඩායමක අදහසකින් උපන් මේ තරගාවලිය පසුගිය වසරේ අගෝස්තු මස 26 වැනිදා කොළඹදී පැවැත්වුනේ දැවැන්ත ප්‍රේක්ෂක ආකර්ෂණයක් සමග.
මීට පෙර අත්විඳ නැති ආකාරයේ අත්දැකීමක් මෙරට සටන් ක්‍රීඩා කලාවට එක් කිරීමේ අරමුණින් ආරම්භ වූ මේ ‘කර්මා ෆයිට් ලීග්’ තරගාවලියෙන් වෘත්තීය සටන්කරුවෙක් නිර්මාණය කිරීමටත් මෙතෙක් නොලැබුනු මූල්‍යමය වටිනාකමක් ඒ සටන් ශිල්පියාට ලබා දීමටත් මේ කණ්ඩායම කටයුතු කර තිබෙනවා.
ඒ අනුව ශ්‍රී ලංකා අපරාජිත KFL ශූරිය වන නිමේෂා කුමාරි ට වෘත්තීය සටන් ක්‍රීඩිකාවක ලෙස සටන් කලාවේ නියැලීම සඳහා Asian Security Group ආයතනයේ පූර්ණ අනුග්‍රහය ලබා දීමට තීරණය කර තිබෙනවා.
නිමේෂා කුමාරි
මේ දැවැන්ත අනුග්‍රහය යටතේ නිමේෂා කුමාරි ට වෘත්තීමය දීමනාවක්, පුහුණුවීම් හා පුහුණුකරුවන් සඳහා දීමනාවක් මෙන්ම ඇගේ වෛද්‍ය කටයුතු සඳහා දීමනාවක් ඇතුළුව වෘත්තීය සටන්කරුවකු ලෙස සෑම අංශයකින්ම ආවරණය වන අන්දමේ දීමනා ලබා දෙමින් සන්නාම තානාපති තත්ත්වයක් ද ලබා දී තිබෙනවා.
ශ්‍රී ලංකාවේ අනෙකුත් ක්‍රීඩාවන්හි ක්‍රීඩක ක්‍රීඩිකාවන්ට සන්නාම තානාපතිවරුන් ලෙස කටයුතු කිරීමට අවස්ථාව හිමි වූවත් සටන් ශිල්පීන්ට එය ඉතා විරල අත්දැකීමක්. බොක්සිං නොවන සටන් ක්‍රීඩාවක නියැලී සිටින ක්‍රීඩිකාවකට සන්නාම තානාපතිත්වය ලබා දුන් පළමු අවස්ථාවයි මේ. මේ අකාරයෙන්, දිවයින පුරා විසිරී සිටින දක්ෂ සටන්කරුවන් ජාත්‍යන්තරයට රැගෙන යාම Asian Security Group හි ඒකායන අරමුණ වී තිබෙනවා.
KFL Season 1 සටන්කරුවන් වෙනුවෙන් වෙන් කෙරුණු ත්‍යාග මුදල රුපියල් ලක්ෂ හතරකට වැඩියි
KFL Season 1 සටන්කරුවන් වෙනුවෙන් වෙන් කෙරුණු ත්‍යාග මුදල රුපියල් ලක්ෂ හතරකට වැඩියි. මෙවර එය රුපියල් මිලියන 1.2 ඉක්මවා යනවා.
KFL වෙනුවෙන් K-1 සටන් ක්‍රමවේදය එක්කර ගැනීම නවමු වෙනසකට මං විවර කිරීමක්. K-1 ජපානයේ ආරම්භ වී උන්මාදයක් මෙන් ඉතා සීඝ්‍රයෙන් පැතිර ගිය ද, 2008 වසරේදී එය බිඳ වැටුනා.
එහෙත් වර්තමානයේ මේ සටන් ක්‍රීඩාව ලොව පුරා වේගයෙන් ජනප්‍රිය වෙමින් තිබෙනවා. K-1 සටන් ශිල්පයේ ප්‍රධාන අරමුණ කුංෆූ, කරාටේ, මුවාතායි හා බොක්සිං යනාදී විවිධ සටන් ක්‍රම එක ම වේදිකාවකට ගෙන ඒම. ශ්‍රී ලංකාව තුළ විසිරී සිටින විවිධ සටන් ශිල්පීන් මිශ්‍ර සටන් කලා වේදිකාවක රංගනයේ යෙදෙන දුර්ලභ අවස්ථාව ක්‍රීඩා ලෝලී නරඹන්නන්ට ලබා දීමට KFL කණ්ඩායම සමත් වුනා.
KFL සටන් රාත්‍රීන් දෙකක් මේ වන විට සාර්ථකව පවත්වා තිබෙනවා. එළඹෙන ජූලි 27 වැනිදා පැවැත්වෙන්නේ එහි තෙවැන්නයි. මෙහි විනිශ්චය මණ්ඩලයේ කටයුතු කරන්නේ KFL සම-නිර්මාතෘ හා නිෂ්පාදක ඉල්හාම් හොසන්, සටන් ක්‍රීඩා අධ්‍යක්ෂ දයාන් සමරසේකර, මහජන සම්බන්ධතා හා සන්නිවේදන අධ්‍යක්ෂ ශාම් ඉම්පෙට්, ඒශියන් සෙකියුරිටි ආයතනය නියෝජනය කරමින් දිමන්ත ජයවර්ධන, නිමේෂා කුමාරිගේ පුහුණුකරු ජමිත ගයාන් හා නිමේෂා කුමාරි.
සටහන :
(වර්නන් ගුණසේකර)
ජ්‍යෙෂ්ඨ මාධ්‍යවේදී
[email protected]
theleader.lk
