වසර දෙකහමාරකට අධික කාලයක් යුද හමුදාවේ පාලනය යටතේ ක්‍රියාත්මක වූ මෝටර් රථ ප්‍රවාහන දෙපාර්තමේන්තුවේ වේරහැර රියදුරු බලපත් මුද්‍රණය කිරීමේ අංශය ලබන සැප්තැම්බර් 01 වනදා සිට නැවතත් මෝටර් රථ ප්‍රවාහන දෙපාර්තමේන්තුව යටතට ගන්නා බව මෝටර් රථ කොමසාරිස් ජනරාල් නිශාන්ත අනුරුද්ධ වීරසිංහ මහතා පවසයි.
මෙම රියදුරු බලපත් මුද්‍රණය කිරීම යුද හමුදාව යටතට පැවරීමේදී ඇතිකරගත් ගිවිසුම ප්‍රකාරව එම අංශය නැවත මෝටර් රථ ප්‍රවාහන දෙපාර්තමේන්තුව යටතට පවරා ගන්නා බවයි ඒ මහතා සඳහන් කළේ.
ඒ අනුව, එම අංශයේ කටයුතු පිළිබඳව මෝටර් රථ ප්‍රවාහන දෙපාර්තමේන්තුවේ නිලධාරීන් මේ වන විට පුහුණුව ලබමින් සිටින බව කී මෝටර් රථ කොමසාරිස් ජනරාල්වරයා ඉන් පසුව එම නිලධාරීන් එහි සේවයට අනුයුක්ත කරන බව ද ප්‍රකාශ කළේය.
රියදුරු බලපත් මුද්‍රණ අංශය 2021 ජනවාරි මාසයේ සිට යුද හමුදාව යටතට පවරන ලද්දේ එවකට ජනාධිපති ගෝඨාභය රාජපක්ෂ මහතාගේ යෝජනාවක් අනුව ගන්නා ලද කැබිනට් තීරණයක් මගිනි.
RN
