ගෝල්ෆේස් අරගල භූමියට 2022 මැයි 09 වනදා එල්ල වූ ප්‍රහාරය වැළැක්වීමට අවශ්‍ය පියවර නොගැනීම සම්බන්ධයෙන් කරුණු දක්වන ලෙස අභියාචනාධිකරණය පොලිස්පති සී.ඩී. වික්‍රමරත්න මහතාට නියම කර තිබේ.
ඒ, “ගෝටාගෝගම” අරගල භූමියට සංවිධානාත්මක පිරිසක් කඩා වැදී ප්‍රචණ්ඩ ක්‍රියා සිදු කළත් පොලිසිය එය වළක්වා ගැනීමට පියවර නොගත් බව පවසමින් අරගලයේ ක්‍රියාකාරිකයකු වූ ජනක්. එස්. විතාරණ ගොනුකර තිබුණු රීට් පෙත්සමක් ඊයේ (31) අභියාචනාධිකරණය හමුවේ කැඳවූ අවස්ථාවේදීය. එම ප්‍රචණ්ඩ ක්‍රියා වැළැක්වීමට නිසි පියවර නොගැනීම පිළිබඳව පොලිස්පතිවරයා සහ පොලිසිය වගකිව යුතු යැයි මානව හිමිකම් කොමිසම ද නිර්දේශ කර ඇති බවයි පෙත්සමෙන් කරුණු දක්වා තිබේ.
අභියාචනාධිකරණයේ සභාපති විනිසුරු නිශ්ශංක බන්දුල කරුණාරත්න සහ ඒ. මරික්කාර් යන විනිසුරුවරුන්ගෙත් සැදුම්ලත් විනිසුරු මඬුල්ලක් හමුවේ එම පෙත්සම කැඳවනු ලැබිණි.
පෙත්සම සම්බන්ධයෙන් ඉදිරිපත් වූ කරුණු සලකා බැලූ විනිසුරු මඬුල්ල එය විභාගයට ගැනීමට තීරණය කළ අතර පොලිස්පතිවරයාට නොතීසි නිකුත් කරන ලදී.
RN
