නිශ්මං රණසිංහ අගෝස්තු 07, කොළඹ LNW:
අවුරුදු 25 න් පහළ ප්‍රධාන පෙළේ ක්‍රිකට් තරගාවලියේ පළමු දින දෙක ගෙවෙන විට ක්‍රීඩකයින් පිත්තෙන් සහ පන්දුවෙන් ඉහළ දස්කම් දැක්වීම සතුටට කරුණකි.පිතිකරුවන් අතරින් ශතක 10 ක් වාර්තා වුණ අතර ඒ අතරින් හොඳම ඉණිම දියත් කළේ බ්ලූම්ෆීල්ඩ් ක්‍රීඩා සමාජයේ නායක මිනෙත් ප්‍රේමරත්නය.ඔහු මහනුවර තරුණ කණ්ඩායමට එරෙහිව නොදැවී ලකුණු 158 රැස් කළේය.එසේම ඉණිමක කඩුලු 5 ට වඩා දවාගත් පන්දු යවන්නන් 10 දෙනෙකු දකින්නට ලැබුණු අතර ඒ අතරින් චිලව් මේරියනස් කණ්ඩායම නියෝජනය කළ මෙලන් හංසක ලකුණු 65 කඩුලු 7 ක් දවා ගන්නට සමත්විම ඉණිමක හොඳම පන්දු යැවීම විය.ඔහු එම දස්කම් පෑවේ නාවික හමුදා කණ්ඩායමට එරෙහිවය.
පැවති තරග අතරින් අටකම ජය පරාජය නොවිසඳුනි.එම තරග වූයේ බ්ලූමෆීල්ඩ් – මහනුවර තරුණ,එන්සීසී – සෙබස්ටියන්නයිට්ස්,නුගේගොඩ – මැලේ,කුරුණෑගල තරුණ – ගාල්ල,මොරටුව – මුවර්ස්,යුද හමුදා – බීආර්සී,මීගමුව – සීසීසී සහ එස්එස්සී – පොලිස් යන තරගය.
ඉහළම ජයග්‍රහණය වාර්තා කරන්නට සමත් වූයේ චිලව් මේරියනස් කණ්ඩායමය.ඔවුන් නාවික හමුදා කණ්ඩායමට එරෙහිව ඉණිමක සහ ලකුණු 75 ක ජයක් වාර්තා කරන්නට සමත් විය.ලියෝ ක්‍රීඩා සමාජයට එරෙහිව කළෙ කෝල්ට්ස් ක්‍රීඩා සමාජය කඩුලු 9 ක් ජයක් වාර්තා කරන්නට සමත් වූ අතර බදුරලිය කණ්ඩායම කඩුලු 9 ක ජයක් වාර්තා කළේ යුනයිටඩ් සදර්න් කණ්ඩායමට එරෙහිවය.
