සටහන – රෂිකා හෙන්නායක
කොළඹ (LNW): රජයේ විකිරණ විද්‍යා තාක්ෂණවේදීන්ගේ සංගමය දන්වා සිටින්නේ ඉදිරි මාස කිහිපය තුළ රජයේ රෝහල්වල CT scan, MRI සහ PET scan පරීක්ෂණ සේවා නතරවීමේ අවදානමක් පවතින බවයි .
විකිරණ තාක්ෂණවේදීන්ගේ පවතින හිඟය හේතුවෙන් මෙම සේවා ක්‍රියාත්මක කරවීම ගැටලු සහගත වී ඇති බවත් , ඒ පිළිබඳ සෞඛ්‍ය අමාත්‍යාංශයට දැනුම්වත් කළ ද මේ වන තෙක් ඔවුන් නවක නිලධාරීන් බඳවා ගැනීමට පියවර ගෙන නොමැති බව ධර්මවික්‍රම මහතා පැවසුවා.
“ඉදිරි මාස කිහිපය තුළ රජයේ රෝහල් පද්ධතිය තුළ තිබෙන CT scan, MRI, PET scan සහ ශල්‍යාගාරවල විකිරණ සේවාව, හෘද රෝග අංශවල කැතීටකරණ ඒකකවල බිඳවැටීමක් සිදුවෙන්න පුළුවන්. ඒකට හේතුව වන්නේ මේ ඒකකවල සේවාවන්වල නිරතවෙලා ඉන්න විකිරණ තාක්ෂණවේදී නිලධාරීන්ගේ තියෙන හිඟය. මේ වනවිට 40%ක පමණ හිඟයක් සමග තමා සේවය පිහිටුවාගෙන යන්නේ. ඒ එක්කම මේ වෙද්දි මාසයකට නිලධාරීන් 3 – 4ක ප්‍රමාණයක් විදේශගත වීමේ ප්‍රවණතාවයක් තියෙනවා. අපි මේ සම්බන්ධයෙන් මාස ගණනාවක් සෞඛ්‍ය අමාත්‍යාංශය දැනුවත් කළා. නමුත් සෞඛ්‍ය අමාත්‍යාංශය එම බඳවා ගැනීම් පරක්කු කරමින් ඉන්නවා. මේ වෙද්දි ඇහැළියගොඩ රෝහලේ සම්පුර්ණයෙන් විකිරණ සේවාව බිඳවැටී තිබෙනවා. ඒකට හේතුව මාස ගණනාවකට පෙර එම රෝහලේ සේවය කළ එකම විකිරණ සේවා නිලධාරිනිය විදේශගත වීම.”
ලෙස ඔහු කියා සිටියා.
රටපුරා සියලු තොරතුරු දැනගන්න එක්වන්න අපගේ Whatsapp Newsroom වෙත??
