රෂිකා හෙන්නායක අගෝස්තු 13, ලෝකය (අවුට්බවුන්ඩ් ටුඩේ):
බංග්ලාදේශ සිසුන්ගේ සිහින සැබෑ කර ගැනීමට තමා කැපවන බව බංග්ලාදේශ අන්තර්වාර රජයේ නායක Muhammad Yunus සදහන් කරයි.
මෙම මස මුල් භාගයේ දී බංග්ලාදේශයේ විරෝධතා මධ්‍යයේ අග්‍රාමාත්‍ය ෂෙයික් හසිනා සිය ධුරයෙන් ඉල්ලා අස්වී එරටින් පළා යාමත් සමග අන්තර්වාර රජයක් පිහිටුවීමට බංග්ලාදේශය පියවර ගත් අතර, විරෝධතාකරුවන්ගේ ඉල්ලීම මත අන්තර්වාර රජයේ ප්‍රධානියා ලෙස මුහම්මඩ් යූනුස් පත්කිරීමට පියවර ගැනුණි.
මේ වන විට බංග්ලාදේශයේ තත්ත්වය සාමාන්‍ය අතට හැරෙමින් පවතින අතර ප්‍රචන්ඩකාරී ක්‍රියාවලින් ඉවත්ව කටයුතු කරන ලෙසයි මුහම්මඩ් යූනුස් විරෝධතාකරුවන්ගෙන් ඉල්ලා සිටින්නේ. එරට නායකත්වය භාර ගැනීමට මූලිකම හේතුව වුයේ තරුණ ප්‍රජාවගේ ඉල්ලීම බව ඔහු සදහන් කරනවා.
තරුණ ප්‍රජාවට අවශ්‍ය බංග්ලාදේශය නිර්මාණය කිරීමට තමා කැපවන බවයි විශේෂ මාධ්‍ය හමුවකට එක්වෙමින් Muhammad Yunus පවසා ඇත්තේ. එමෙන්ම මෙය තමාගේ සිහිනයක් නොව තරුණ ප්‍රජාවගේ සිහිනයක් පමණක් වන අතර එය යථාර්තයක් කර ගැනීමට ඔවුන්ට ලබාදිය හැකි උපරිම සහාය ලබාදෙන බව ද මෙහිදි බංග්ලාදේශ අන්තර්වාර රජයේ නායකයා සදහන් කර තිබෙන බව එරට මාධ්‍ය වාර්තා කරයි.
